არგენტინამ და ბრაზილიამ 0:0 ითამაშეს. ეს იმას ნიშნავს, რომ არგენტინელებს ახლა უკვე მიჯრით 27 შეხვედრა არ წაუგიათ, მსოფლიოს ჩემპიონატის საგზური კი ფაქტობრივად გარანტირებული აქვთ. რაც შეეხებათ ბრაზილიელებს, ისინი შესარჩევი შეჯიბრების ცხრილს 6-ქულიანი უპირატესობით ლიდერობენ. მათ ყატარის საგზური ისედაც „ჯიბეში ედოთ“.
არგენტინას შესარჩევ შეჯიბრებაში ბრაზილიისთვის 2005 წლის მერე არ მოუგია. 2005-ში, „ალბისელესტემ“ 3:1 გაიმარჯვა. ორი გოლი ერნან კრესპომ გაიტანა.
ბრაზილიას არ ჰყავდა ნეიმარი, რიშარლისონი და რობერტო ფირმინო. ნაკრებში პირველად თამაშობდა მადრიდის „ატლეტიკოს“ ამომავალი ვარსკვლავი მატეუს კუნია, რომელსაც პირველი გოლის გატანამდე ცოტა დააკლდა. პირველ ტაიმში მისი ცენტრს უკნიდან დარტყმული კინაღამ ბადეში ჩაეშვა. მცირე მანძილით ასცდა მიზანს.
ზოგადად, შეხვედრა სახიფათო მომენტებით არ გამოირჩეოდა. გუნდებმა კარში (და არა კარისკენ) პირველად მე-40 წუთის შემდეგ დაარტყეს. თავიდან ეს შორიდან, საჯარიმო დარტყმით ფრედმა გააკეთა, შემდეგ კი როდრიგო დე პაულმა სცადა ჩახვეული დარტყმით ალისონის შემოწმება.
მეტოქეები თავდაუზოგავად ებრძოდნენ ერთმანეთს. ნიკოლას ოტომენდი VAR-ს გადაურჩა. იხილავდნენ საკითხს ჩაარტყა თუ არა მან მეტოქეს იდაყვი.
დისციპლინის თვალსაზრისით, მეორე ტაიმიც პირველის მსგავსი გამოდგა. ბრაზილიელთაგან ფრთაზე გააქტიურდა ვინისიუს ჟუნიორი, რომელიც ერთ-ერთი საფირმო რეიდის დროს წააქციეს. დაინიშნა ჯარიმა, საიდანაც ფრედმა მარჯვენა ფეხით ძელს გაჰკრა ბურთი.
თუმცა, ყველაზე სახიფათო მომენტი 72-ე წუთზე ისევ კუნიას ჰქონდა, რომელიც ძალიან ხელსაყრელ მდგომარეობაში აღმოჩნდა, მაგრამ ბურთი პირდაპირ არგენტინის ნაკრებისა და „ასტონ ვილას“ მეკარე ემილიანო მარტინესს დაუმიზნა.
რაც უფრო მეტად უახლოვდებოდა შეხვედრა დასასრულს, მით უფრო ასუსტებდნენ გუნდები „გაზის პედალზე დაწოლას“. საბოლოოდ 0:0. ეს არგენტინისთვის გახლდათ ზედიზედ მეექვსე შეხვედრა, რომელშიც გუნდმა გოლი არ გაუშვა, ბრაზილიას კი მსოფლიოს ჩემპიონატის ბოლო 12 სტუმრად ჩატარებული შესარჩევი მატჩიდან, მეტოქეებმა მხოლოდ სამში გაუტანეს.
