ჰარი კეინმა ინგლისის ნაკრების 94 წლიანი რეკორდი დაამხო — ერთი კალენდარული წლის განმავლობაში 16 სანაკრებო გოლი გაიტანა. „ტოტენჰემის“ თავდამსხმელმა ეს სან მარინოს კარში ოთხი გოლის შეგდებით მოახერხა. მოგეხსენებათ, ინგლისელებმა მსოფლიოს ჩემპიონატის შესარჩევი ეტაპის I ჯგუფის ბოლო ტურის შეხვედრაში სან მარინოს მისავე მოედანზე 10:0 მოუგეს და „ყატარი 2022“-ის საგზური მოიპოვეს. ჯგუფში მეორე ადგილზე პოლონეთი გავიდა.
ხსენებულ „პოკერამდე“ კეინი 12 გოლით რეკორდსმენების ტოლად იყო. ასეთი შედეგი ჰქონდათ ჯორჯ ჰილსდონს 1908 წელს და დიქსი დინს 1927-ში.
სან მარინოს კეინმა პირველ ტაიმში სამი გაუტანა და შესვენების შემდეგ მეოთხეც დაამატა. მან ალბანეთთან შეხვედრაშიც ჰეთ-თრიკი შეასრულა.
საინტერესო რამ აღმოაჩინეს სტატისტიკოსებმა: ერთ სანაკრებო შეხვედრაში ოთხი გოლი კეინამდე 1993 წელს იან რაიტს გაუტანია და ისიც სან მარნოს კარში (7:1).
ახლა „სფურზის“ ბომბარდირს ეროვნული გუნდის მაისურით 48 გოლი აქვს გატანილი. ის ლეგენდარულ გარი ლინეკერს გაუტოლდა, რიგში კი უეინ რუნის რეკორდია — 53 გოლი.
ლინეკერმა დატვიტა: „გაუმარჯოს, კეინ. კეთილი იყოს შენი მობრძანება 48 გოლიანთა კლუბში. ეჭვი მაქვს, რომ შენთვის ამ კლუბის წევრობა რამდენიმე სათამაშო წუთში დასრულდება. შენს გვერდით ყოფნა დიდი სიამოვნება იყო“.
ზემოთ ვახსენეთ, რომ კეინმა პარასკევს ალბანეთს სამი გოლი გაუტანა, რითაც, სავარაუდოდ, „სფურზის“ შემადგენლობაში უხეირო თამაშის პერიოდიც დაასრულა. ალბანეთთან ჰეთ-თრიკს მოჰყვა „პოკერი“ სან მარინოში, თუმცა ჩრდილოლონდონელმა ოთხიდან ორი გოლი პენალტით შეაგდო.
ჰარი კეინი გახდა ინგლისის ნაკრების მეოთხე ფეხბურთელი, ვინც ზედიზედ ორ შეხვედრაში შესრულა ჰეთ-თრიკი და მეტი. პირველი იყო ვივიან ვუდვორდი 1909 წელს, მეორე უკვე ნახსენები დინი 1927 წელს, ხოლო მესამე ტომი ტეილორი 1957.
გარეთ საუთგეიტი: „შესარჩევი ეტაპი ასე იოლად არასდროს დაგვიძლევია. ჩვენ ეს შევძელით, იტალია და ჰოლანდია კი ჯერ გაუგებარ მდგომარეობაში არიან. მართალია, წარუმატებლად გამოსვლის დიდი შანსი არც გვქონდა, მაგრამ ვარშავასა და ბუდაპეშტში კარგად ვითამაშეთ. ჩვენს წარმატებაში საკვანძო როლი სწორედ ამ ორმა შეხვედრამ შეასრულა.
მიხარია, რომ ყველა გამოწვევაზე სწორი რეაგირება მოვახდინეთ. ყველა მეტოქეს, ვისაც ამ შესარჩევ ეტაპზე შევხვდით, აშკარად აღვემატებოდით.
მენტალურად ძლიერი გუნდი გვყავს. ამის დასტური ისაა, რომ 2021 წელს არც ერთ მატჩში, რომელშიც დამატებითი დრო დაინიშნა, პენალტებამდე არ დავმარცხებულვართ. ასე უნდა გავაგრძელოთ. ერთ შეხვედრაში გაშვებული გოლების საშუალო რაოდენობით ევროპაში საუკეთესო შედეგი გვაქვს. გატანილი გოლებისა და შექმნილი მომენტების რაოდენობით კი მეხუთე ადგილზე ვართ. ამის გამოსწორება საინტერესო ამოცანაა“.
