ინგლისურ პრესაში დაიწერა, რომ „მანჩესტერ იუნაიტედი“ ოლე გუნარ სულშერის ზინედინ ზიდანით შეცვლის მიზნით ნაბიჯებს ააქტიურებს. სულშერი განსაკუთრებული რისხვის ობიექტი მას მერე გახდა, რაც „იუნაიტედმა“ შინ „ლივერპულთან“ და „მანჩესტერ სიტისთან“ 0:5 და 0:2 წააგო.
იმასაც ამბობენ, რომ სულშერს კლუბის ხელმძღვანელებმა თითქოსდა სამი თამაში უბოძეს, მაგრამ, როგორც ჩანს ეს საერთო სურათს ვერ შეცვლის. თან, „სანდი ტაიმსი“ დაჟინებით ირწმუნება, რომ მანჩესტერელთა შეფები ზიდანის დასაქირავებლად რეალურად მუშაობენ.
ზიდანი, მოგეხსენებათ, გასული სეზონის ბოლოს „რეალის“ მწვრთნელის თანამდებობიდან გადადგა. 49 წლის ფრანგმა, ორ ჯერზე, მადრიდულ კლუბთან ერთად დიდ წარმატებებს მიაღწია. მისი ხელმძღვანელობით „თეთრებმა“ სამჯერ მოიგეს ჩემპიონთა ლიგა და ორჯერ ესპანეთის ჩემპიონის ტიტული.
ზიდანზე ამბობდნენ, რომ თუ მაურისიო პოჩეტინო „პარი სენ ჟერმენს“ წარმატებით ვერ გაუძღვებოდა „პარკ დე პრენსზე“ ის გადაიბარებდა საქმეებს. მას აგრეთვე განიხილავდნენ საფრანგეთის ნაკრებში დიდიე დეშამის შემცვლელად.
ზიზუს „მანჩესტერ იუნაიტედში“ მიყვანას ის პლუსიც აქვს, რომ იქ მისი ორი ყოფილი ფეხბურთელი, რაფაელ ვარანი და კრიშტიანუ რონალდუ თამაშობენ. ვარანიცა და რონალდუც „ოლდ ტრეფორდზე“ ზაფხულში გადავიდნენ.
2018 წელს, როდესაც „მანჩესტერ იუნაიტედს“ მწვრთნელად სულშერი მოჰყავდა, ლაპარაკობდნენ „კულტურული გადატვირთვის“ პროგრამაზე, რომელსაც ნორვეგიელი უნდა ჩადგომოდა სათავეში. ახლა ამბობენ, რომ ამ გადატვირთვას ყველაზე კარგად ზიდანი გაუძღვება, ვინაიდან მას ეხერხება როგორც ტიტულების მოგება, ასევე ახალგაზრდა ფეხბურთელების წინა პლანზე წამოწევა.
სულშერი კი სამი წელიწადია „ოლდ ტრეფორდზე“ მუშაობს და ჯერ ერთი ჯილდოც ვერ მოუგია. წესით, კონტრაქტის გახანგრძლივების შესახებ „იუნაიტედის“ ხელმძღვანელობამ მასთან დეკემბერში უნდა ილაპარაკოს, მაგრამ ამ ეტაპზე უცნობია როგორ განვითარდება მოვლენები.
აქამდე ამბობდნენ, რომ სულშერის შემცვლელად კლუბში ოთხ კანდიდატურას განიხილავდნენ: ზიდანს, ანტონიო კონტეს, ერიკ ტენ ჰაგსა და ბრენდენ როჯერსს.
კონტე, მოგეხსენებათ, „ტოტენჰემს“ ჩაუდგა სათავეში. როჯერსი სავარაუდოდ იმ შემთხვევაში გახდება ფავორიტი, თუ ზიდანი უარს იტყვის, მაგრამ მას კარიერაში მანჩესტერელთა გაგებით შავი ლაქა აქვს: 2012-15 წლებში „ლივერპულს“ ხელმძღვანელობდაა.
