„ბარსელონამ“ „ალავესს“ უმასპინძლა და ერთ ქულაზე მეტის მოპოვება ვერ შეძლო. შეხვედრა დამთავრდა 1:1.
თუ კატალონიელთა მომავალი მწვრთნელი ჩავი თამაშს უყურებდა, კიდევ ერთხელ დარწმუნდებოდა, რომ მას დიდ პრობლემებთან მოუწევს შეჭიდება. რასაკვირველია, იყო დადებითი მომენტებიც, მაგალითად ყმაწვილკაცების გავისა და ნიკოს ეპიზოდური გაბრწყინებები, მაგრამ საბოლოოდ, „კამპ ნოუზე“ მისული 39 737 მაყურებელი კვლავ მოღუშული წავიდა შინ.
„ალავესთან“ შეხვედრაში „ბარსას“ დროებითი მწვრთნელი სერხი ბარხუანი ხელმძღვანელობდა. ობიექტურად უნდა ითქვას, რომ მის ხელთ არც დიდი რესურსი იყო და არც რაიმეს შეცვლის შესაძლებლობა, ამიტომ გასაკვირი არ არის, რომ ისევ ის განმეორდა, რაც მთელი სეზონის განმავლობაში ხდება.
ამ მატჩში, ორი ქულის გარდა „ბლაუგრანამ“ დაკარგა ჟერარდ პიკე, რომელმაც მოედანი 70-ე წუთზე კოჭლობით დატოვა და სერხიო აგუერო, რომელიც პირველი ტაიმის მიწურულს მოედანზე დაწვა და მკერდზე იკიდებდა ხელს. არგენტინელი გამოსაკვლევად საავადმყოფოში წაიყვანეს.
ანგარიში მემფის დეპაიმ საჯარიმო მოედნის გარედან ჩახვეული ლამაზი დარტყმით გახსნა. გახარებულმა ჰოლანდიელმა თითებით ყურებთან მიიტანა, აქაოდა კრიტიკოსების ხმა მომასმენინეთო.
საქმე ის არის, რომ მემფისი გუნდში გაგდებული მწვრთნელის რონალდ კუმანის მიყვანილია. და კუმანის საუბედუროდ სწორედ დეპაი იყო ის ფეხბურთელი, რომელმაც „ელ კლასიკოში“ ბურთი დაკარგა, რასაც „რეალის“ გოლი მოჰყვა. მანვე ვერ გაიტანა პენალტი „რაიო ვალეკანოს“ კარში, რის შემდეგაც კუმანი თანამდებობიდან დაითხოვეს.
ბედის ირონიაც ამას ჰქვია: თითქოს სწორედ კუმანის გაშვებას ელოდაო, თანამემამულის წასვლის შემდეგ პირველივე შეხვედრაში, დეპაიმ ვირტუოზული დარტყმით გახსნა ანგარიში.
მაგრამ, ბარსელონელთა სიხარულს სამ წუთზე მეტი არ ეწერა. თან, „ალავესის“ გოლიც არანაკლებ ლამაზი გამოვიდა. რიოხამ მასპინძლებს შორის ისე გაირბინა, რომ მხოლოდ ერთხელ გაუთამაშა ბურთი ჟოსელუს. მან გააბითურა ნიკო, სერხიო ბუსკეტსი, სერჯინიო დესტი, პიკე და მეკარე მარკ ანდრე ტერ შტეგენი, ბოლოს კი გოლი შეაგდო.
მდგომარეობის გამოსწორება მოედანზე სერხიო აგუეროს ნაცვლად შესულმა ფილიპე კოუტინიუმ სცადა, მაგრამ მას ჩინებულად აუღო მეკარე ანტონიო სივერამ. „ალავესის“ მეორე გოლკიპერი დაშავებული ფერნანდო პაჩეკოს ნაცვლად იდგა კარში.
„ბარსას“ კიდევ ჰქონდა რამდენიმე მომენტი, მაგრამ გოლი ვერ შეაგდო და საბოლოოდ, მეტისმეტად შემცირებული მაყურებლის სტვენა მოისმინა.
11 ტურის შემდეგ, „ბარსა“ 16 ქულით მე-9 ადგილზეა, მაგრამ ამ ტურში, ლა ლიგაში კიდევ ექვსი თამაშია და არ არის გამორიცხული უფრო ქვემოთ გადაინაცვლოს.
