ესპანეთის ჩემპიონატთან დაკავშირებით საინტერესო სტატისტიკა გამოაქვეყნა Opta-მ. ბოლო დროს ბევრს ლაპარაკობენ, რომ ლა ლიგაში ბურთაობის სუფთა დრო ბევრი არ არის. „ბეტისის“ მწვრთნელმა, ცნობილმა მანუელ პელეგრინიმ ამის შესახებ თავისი უკმაყოფილებაც გამოხატა. და აი, გულშემატკივრის ინტერესის დასაკმაყოფილებლად დათვალეს, თამაშის განმავლობაში საშუალოდ რომელი გუნდი რამდენ ხანს ფლობს ბურთს.
როგორც ესპანურ მედიაში წერენ, გასაკვირი არაფერი იყო იმაში, რომ ყველაზე ცოტას „ვალენსია“ თამაშობს — ეს მისი მწვრთნელის ხოსე ბორდალასის მიდგომით არის განპირობებული. „ვალენსიას“ მაჩვენებელი შეხვედრაში 48,4 წუთია.
ბორდალასი „ხეტაფეში“ მუშაობის დროსაც ჩაკეტილი, დაცვაზე აგებული, „უბურთო“ ფეხბურთით იყო ცნობილი და მიდგომა არც „მესტალიაზე“ გადასვლის მერე შეუცვლია.
„უბურთო“ ხუთეულში აღმოჩნდნენ „რაიო ვალეკანო“, „მალიორკა“, „გრანადა“ და ხსენებული „ხეტაფე“. ამ გუნდებს შორის ლა ლიგის ცხრილში ყველაზე მაღლა, მე-8 ადგილზე, „რაიო ვალეკანოა“.
თამაში კი მიმდინარე სეზონში ყველაზე მეტად წლეულს „რეალს“ ჰყვარებია — მადრიდელები მატჩში საშუალოდ 56,3 წუთს ბურთაობენ. მეორეზეა „ვილიარეალი”. შემდეგ მოდიან „ატლეტიკო”, „ბარსელონა” და „ბეტისი”.
