ეს იყო ყველაზე შავი დღე ოლე გუნარ სულშერისთვის მას მერე, რაც „მანჩესტერ იუნაიტედის“ მწვრთნელი გახდა. მანკუნიანელებმა „ლივერპულთან“ შინ 0:5 წააგეს. ამ ისტორიულ მოქიშპესთან „იუნაიტედი“ შინ ასე მწარედ არასდროს დამარცხებულა და კიდევ — რაც პრემიერლიგაა, პირველი ტაიმი 0:4 არ წაუგია.
მო სალაჰმა ჰეთ-თრიქი შეასრულა. შეცვლაზე შესვენებისას შესული პოლ პოგბა 15 წუთში გააძევეს — ფრანგმა პირდაპირ წითელი ბარათი მიიღო. ის ნაბი კეიტას ეძგერა და ექიმებს საკაცით გააყვანინა მოედნიდან.
„ოლდ ტრეფორდზე“ უჩვეულო რამ მოხდა — მაყურებელმა პირველი ტაიმის შემდეგ დაიწყო ტრიბუნების დატოვება. არნახულ სტვენასა და ობსტრუქციაზე აღარაფერს ვიტყვით.
სულშრეს პრეს-კონფერენციაზე ჯიქურ ჰკითხეს, ხომ არ მიხვდა ბოლოს და ბოლოს, რომ „მანჩესტერ იუნაიტედის“ მწვრთნელობას ვერ ერევა. ნორვეგიელმა უპასუხა:
„ჩანაფიქრთან ძალიან ახლოს ვართ იმისათვის, რომ ახლა დავნებდეთ. როგორც ჯგუფი უკვე დიდი ხანია ერთად ვმუშაობთ. მე მჯერა საკუთარი თავის. მწამს, რომ ახლოს ვარ იმასთან, რაც მინდა. რაც გავაკეთეთ ფუჭი არ ყოფილა.
ბოლოდროინდელი შედეგები ნამდვილად არ ვარგოდა. გასაგებია, რომ ეს ფაქტი ბევრის გონებაში ეჭვს ბადებს, მაგრამ მე ვალდებული ვარ სიმტკიცე შევინარჩუნო და შრომა განვაგრძო. კლუბის ხელმძღვანელთაგანაც მხოლოდ ის მესმის, რომ არ უნდა დავნებდე, ამიტომ ახლა უკვე ხვალის სამუშაოზე ვფიქრობ.
ცუდ დღეში ვართ. ამაზე უარეს მდგომარეობაში არც ვყოფილვარ, მაგრამ პასუხისმგებლობას სრულიად ვიღებ ჩემს თავზე. დღეს მე დავმარცხდი და ამიტომ გუნდი წინ მე უნდა წავიყვანო“.
„ლივერპულის“ ფანები თავიანთი ტრიბუნიდან სარკასტულად ყვიროდნენ „ოლე საჭესთან არის“ და „ოლე უნდა დარჩეს“. ხუთი გაშვებული გოლის გარდა „მანჩესტერ იუნაიტედის“ სამწუხაროდ, გარდა იმისა, რომ VAR-მა პოლ პოგბას მოედნიდან გაძევება ბრძანა, მაანვე კრიშტიანუ რონალდუს გოლი არ ჩაუთვალა.
„მანჩესტერ სიტისთან“ შინ 1:6 დამარცხების ათი წლის თავზე, „იუნაიტედმა“ 0:5 იწვნია — ასეთი ანგარიში „ოლდ ტრეფორდზე“ 1955 წლის შემდეგ არ დაფიქსირებულა, მას მერე, რაც იმავე „სიტიმ“ მოუგო 5:0.
ახლა, სულშერის გუნდს ბოლო 9 შეხვედრიდან 5 აქვს წაგებული, ხოლო ბოლო 21 შეხვედრაში მხოლოდ ერთი იყო ისეთი, რომელშიც გოლი არ გაუშვა.
„ვინმეს შეიძლება გაახსენდეს, როგორ წავაგეთ გასულ სეზონში „ტოტენჰემ ჰოთსპურთან“ 1:6, მაგრამ რაც ახლა მოხდა გაცილებით უარესია. ეს შოკი რაც შეიძლება მალე უნდა დავძლიოთ.
თავის ხელში აყვანა რასაკვირველია, ძნელი იქნება. ფეხბურთელები ნირწამხდარები იქნებიან, მაგრამ ხასიათის სიმტკიცეს სწორედ ასეთ დროს უნდა გამოჩენა. ბოლო რამდენიმე კვირაა, გაუვალ კედელს შევეჯახეთ. არა და არ გამოგვდის თამაში, ბევრ გოლს ვუშვებთ“, — დააგვირგვინა მწვრთნელმა.
ჰარი მაგუაირმა ფანებს ბოდიში მოუხადა:
„ჩვენ გულშემატკივარს ბოდიშს ვუხდით. „ლივერპულთან“ ნებისმიერი წაგება გულსატკენია. იმედგაცრუებული ვარ. მეტოქეს წარმოუდგენლად ბევრი სახიფათო მომენტის შექმნის შესაძლებლობა მივეცით. მე მცველი ვარ და პირველ ტაიმში ოთხი გოლის გაშვება, თან „ოლდ ტრეფორდზე“ ძალიან ცუდ თამაშს ნიშნავს.
ახლა ერთსულოვნება გვმართებს. წაგების ერთმანეთისთვის დაბრალება კარგს არაფერს მოგვიტანს. სახლში რომ მივალთ, ყველამ სარკეში უნდა ჩავიხედოთ და მდგომარეობის გაუმჯობესებაზე ვიფიქროთ“.
„ლივერპულს“ „მანჩესტერ იუნაიტედისთვის“ 5:0 1925 წლის სექტემბრის შემდეგ არ მოუგია. 1925-ში „წითლებმა“ მანკუნიანელებს შინ აჯობეს ასეთი ანგარიშით.
მერსისაიდელთა მწვრთნელი იურგენ კლოპი: „ნამდვილად დიდი დღეა. შედეგს შეიძლება არანორმალური ვუწოდოთ. თამაშის მერე მითხრეს, რომ „ლივერპულის“ ხანგრძლივ ისტორიაში ასეთი რამ არ მომხდარა.
„ლივერპული“ ყოველთვის ცდილობს თავის ისტორიაში ახალი სასახელო ფურცელი ჩაწეროს და ესეც ერთ პატარა ფურცლად იგულეთ. ასეთი რამ ხშირად არ ხდება. ის კი არა, შეიძლება საერთოდ არ მოხდეს.
შესვენებისას ბიჭებს უკეთესად თამაშისკენ მოვუწოდე. პოგბას გაძევებამ და ადრეულმა გოლმა კი შეხვედრა დაასრულა.
ნაბი კეიტას მდგომარეობას ხვალ-ზეგ შევიტყობთ ზუსტად. მთელი ძალით წვივებში რომ მოგარტყამენ — მტკივნეულია“.
სალაჰმა კი ზედიზედ მეათე შეხვედრაში გაიტანა გოლი, მაგრამ რაც უფრო მთავარია, გახდა პირველი ფეხბურთელი, ვინც პრემიერლიგაში, „ოლდ ტრეფორდზე“, ჰეთ-თრიკი შეასრულა.
