საქართველოს ნაკრების ფლანკერმა გიორგი ცუცქირიძემ თავის ფრანგულ კარიერაში მე-6 ლელო მიითვალა.
პრო დ2-ის მე-8 ტურის მატჩში ცუცქირიძის „ორიაკი“ აჟენს სტუმრობდა და ბოლო წუთებზე 14:25 მარცხდებოდა, როცა გიომ მასპინძლები დაალელოვა და თავის გუნდს მცირე სხვაობით მარცხისთვის ბონუს-ქულა მოუტანა. ცუცქირიძემ სეზონში მეექვსე მატჩში მეორე ლელო გაიტანა და ლევან მაისაშვილს ნაკრების მესამე ხაზის დაკომპლექტებისას ნამდვილი თავსატეხი ექნება – ყველა კანდიდატი ხომ გამორჩეულად კარგ ფორმაშია…
გიომ „აჟენთან“ შეუცვლელად ითამაშა, ხოლო კვაჭი ლუკა ნიორაძე მატჩში 49-ე წუთიდან ჩაერთო.
„აჟენმა“ კი ორწლიანი პაუზის შემდეგ როგორც იქნა გამარჯვების მოპოვება მოახერხა. ბოლოს ამ გუნდმა 2019 წლის ოქტომბერში მოიგო და მას შემდეგ ყველგან და ყევლაფერს აგებდა. „ორიაკთან“ 25:21 გამარჯვებამ მაინც ვერ მოაცილა აჟენელები მიმდინარე გათამაშების ბოლო ადგილს, თუმცა აჟენში მაინც დიდი ზეიმი გაიმართა. ამ წარმატებაში ორი ბირჯღალოსნის ხელიც ურევია: გრიგორ ქერდიყოშვილმა პირველიდან 50-ე წუთამდე ითამაშა, ხოლო ჯაბა ბრეგვაძემ სრული მეორე ტაიმი დაჰყო მინდორზე.
ლიდერი კი ამიერიდან ორია – „მონ-დე-მარსანი“ და „ბაიონი“ 29-29 ქულით პირველ-მეორე ადგილებს ინაწილებენ. პირველმა „მონტობანთან“ სტუმრად 18:22 წააგო და სანუგეშო ბონუსი მიიღო. გამარჯვებულთა შორის მირიან ბურდულმა საწყისი 24 წუთი ითამაშა, ხოლო სტუმართა რიგებში ბოლო 16 წუთი ლაშა მაჭარაშვილმა ირაგბა.
„ბაიონმა“ კი „პროვანსს“ უმასპინძლა და 47:19 გაანადგურა, თან შემტევი ბონუსიც მიიღო. ბასკთა შორის ბორჯღალოსან კოტე მიქაუტაძეს მარქაფიდან თამაშში ჩართვა უკვე მე-2 წუთზე მოუხდა, როცა მის პარტნიორს ტვინის შერყევის პროტოკოლის ძალით მოედნის 10 წუთით დატოვებამ მოუწია. კოტე მე-14 წუთზე თადარიგში დაბრუნდა, მაგრამ 46-ეზე მოედანზე კვლავ გამოჩნდა და ბოლომდეც ითამაშა.
ბექა კაკაბაძემ ბოლო 20 წუთი ითამაშა მისი „ოიონას“ რუანში წაგებულ გასვლით მატჩში – 16:25, ხოლო ვაჟა კაპანაძე 48-ე წუთზე ჩაერთო თავისი „ბრესანისა“ და „ნარბონის“ შეხვედარში (36-33).
ტური ფრედ დასრულებული მატჩით დაგვირგვინდა: „ნევერი“ – „გრენობლი“ 21:21. მასპინძელთა სასტარტოში თორნიკე მატარაძე იყო, რომელიც 54- წუთზე შეცვალეს, ხოლო სტუმართა გუნდის საწყის თხუთმეტეულში ერთბაშად ორი ჩვენებური იყო – ზურაბ ჟვანია 57-ე წუთზე დაასვენეს, ხოლო ილია კაიკაციშვილი – 62-ეზე.
