„ვალენსიას“ გულშემატკივრებმა „ნოუ მესტალიას“ გაჯანჯლებულ მშენებლობასთან დაკავშირებით ახალი ამბები შეიტყვეს.
„ნოუ მესტალია“ გახლავთ ქალაქ ვალენსიას ახალი სტადიონი, რომლის მშენებლობაც 2009 წელს შეწყდა და მას მერე დგას ასე, დაუმთავრებელი და უშნო. მშენებლობის შეჩერების მიზეზი მარტივი მისახვედრია: ფინანსური პრობლემები.
სადღეისოდ ახალ სტადიონს უფრო დაუსრულებელი ეთქმის, ვიდრე დაწყებისთანავე მიტოვებული. ქალაქის მუნიციპალიტეტმა რამდენჯერმე სცადა ფეხბურთის კლუბ „ვალენსიასთვის“ ბიძგი მიეცა, რათა მას საქმე ბოლომდე მიეყვანა, მაგრამ არაფერი გამოვიდა.
და აი, მას მერე, რაც ამ ზაფხულს ლა ლიგამ ბრიტანულ საინვესტიციო ფირმასთან სახელწოდებით CVC Capital Partners დიდი ხელშეკრულება გააფორმა, გაჩნდა იმედი, რომ „ნოუ მესტალიას“ შეიძლება დასრულება ეღირსოს.
საქმე ის არის, რომ ხელშეკრულების თანახმად, სატელევიზიო შემოსავლების 10 პროცენტის სანაცვლოდ, CVC-მ ლა ლიგის იმ კლუბებს, რომლებიც გარიგებაში მონაწილეობენ, ფული მისცა. ძირითადი თანხა ინფრასტრუქტურის განვითარებას უნდა მოხმარდეს, პროცენტები კი ტრანსფერებზე დაიხარჯოს.
ამგვარად, არ არის გამორიცხული, რომ „ვალენსია“ თავის „შავ კარკასს“ ბოლოს და ბოლოს ხელს მოჰკიდებს და სტადიონად აქცევს.
რადიოსადგური Cadena Ser იტყობინება, რომ „ვალენსიას“ დირექტორატმა უკვე მიმართა ორ სამშენებლო კომპანიას. ეს კომპანიები მიტოვებულ მშენებლობას გაეცნობიან, ხარჯს იანგარიშებენ და იტყვიან, უღირთ თუ არა საქმისთვის ხელის მოკიდება.
ითქვა, რომ „ვალენსია“ „ნოუ მესტალიას“ დასამთავრებლად 90 მილიონ ევროს გაიმეტებს. ახალი სტადიონი ძველი „მესტალიადან“ 4 კილომეტრსა და 100 მეტრშია.
უნდოდათ, ახლის ტევადობა 80 000 ყოფილიყო, მაგრამ მიზეზთა გამო 54 000-მდე შეამცირეს.
