შვედეთი მსოფლიოს ჩემპიონატის შესარჩევ B ჯგუფს სათავეში მოექცა, ესპანეთს გადაასწრო. საამისოდ მან შინ 2:0 მოუგო საქართველოდან გამარჯვებით ჩასულ საბერძნეთს. გოლები გაიტანეს ემილ ფორსბერგმა, პენალტით და ალექსანდერ ისაკმა.
არადა, შეხვედრის პირველი მომენტები ბერძნებმა შექმნეს. სულ თავიდან ტასოს ბაკასეტასმა გიორგოს მასურასი მახვილი კუთხიდან შეიყვანა სახიფათოდ, მაგრამ მან გარედან გაარტყა ბადეს ბურთი. მასურასმა ერთი ხნის შემდეგ გოლიც გაიტანა, თუმცა ის არ ჩაითვალა, რადგან თამაშგარე იყო, მოგვიანებით კი იმავე მასურასმა კვლავ მახვილი კუთხიდან გაარტყა ბურთი ძელს, ამჯერად შორეულს.
ამ დღეს „ოლიმპიაკოსის“ თავდამსხმელი შესანიშნავ ფორმაში იყო. მან კიდევ ერთ ეპიზოდში გამოიჩინა თავი, როდესაც ჩინებულად ჩააწოდა მაღალი ბურთი ვანგელის პავლიდისს, თუმცა მან ის თავურით ხარიხას გაარტყა.
შესვენებამდე შვედებმა მხოლოდ ერთხელ შეუტიეს სტუმრების კარს სახიფათოდ. ეს გახლდათ ფორსბერგის დარტყმა შორიდან, რომელიც მეკარემ მოიგერია.
შესვენების შემდეგ კი მასპინძლების სასარგებლოდ პენალტი დაინიშნა. ეს 59-ე წუთზე მოხდა. ამ ეპიზოდში სადაო არაფერი იყო, კონსტანტინოს მავროპანოსმა ისაკი აშკარად მოცელა, ფორსბერგმა კი თერთმეტი მეტრიდან ანგარიში გახსნა.
ათ წუთში ისაკმა შვედი ქომაგების გასახარად მეორე გოლი გაიტანა. ამ ეპიზოდში, შეიძლება ითქვას, რომ ბერძნების მთელი გუნდი შეცდა, რადგან თავდამსხმელს მეკარის გადმოგდებული ბურთის მიღების და კარში შეგდების საშუალება მისცა.
სტუმრებისთვის დასანანი მომენტი იყო 86-ე წუთზე პანტელის ჰაციდიაკოსის გაძევებაც. მიზეზი: მეორე ყვითელი.
ახლა შვედებს ორი თამაში დარჩათ, 11 ნოემბერს საქართველოში და 14 ნოემბერს ესპანეთში. ამ ორ შეხვედრაში გამოჩნდება შეინარჩუნებენ იან ანდერსონის ბიჭები ცხრილში პირველ პოზიციას თუ ვერა.
