ბარსელონელი გავი 17 წლისაა. ის 2004 წლის 5 აგვისტოს სევილიის პროვინციაში გახლავთ დაბადებული. მისი სრული სახელია პაბლო მარტინ პაეს გავირია. და ეს ყმაწვილი, მთელი ესპანეთის გასაკვირად, ლუის ენრიკემ „სან სიროზე“, ევროპის ჩემპიონ იტალიის ნაკრებთან ათამაშა ოფიციალურ შეხვედრაში.
ესპანეთის ნაკრებმა „სკუადრა აძურას“ ერთა ლიგის A დონის ფლეი-ოფში 2:1 მოუგო, ხოლო გავიმ დაღვინებული, მაღალი დონის ფეხბურთით სპეციალისტები და გულშემატკივრები აღაფრთოვანა.
„ლა როხას“ ისტორიაში ასეთმა ახალგაზრდამ პირველად ითამაშა. ადრე იყო ანხელ სუბიეტა, რომელმაც 1936 წელს 17 წლისამ და 284 დღისამ მოირგო ნაკრების მაისურა, გავი კი წუხელ 17 წლისა და 62 დღისა გახლდათ.
ასაკის მიუხედავად, ბარსელონელი ბურთს თამამად ითხოვდა და კომბინაციებს ისეთ გამოცდილ თანაგუნდელებთან ათამაშებდა, როგორებიც არიან კოკე და სერხიო ბუსკეტსი.
„მარკა“ წერს, რომ მისი ოსტატობის ერთ-ერთი ყველაზე თვალსაჩინო მომენტი იყო მე-13 წუთზე, როდესაც ფედერიკო კიეზა მარკოს ალონსოსა და კოკეს გასცდა, მაგრამ გავიმ „იუვენტუსის“ თავდამსხმელს დროული ორთაბრძოლით შეუშალა ხელი.
ესპანელ ჟურნალისტებს ძალიან მოეწონათ, რომ ყმაწვილი შავ სამუშაოს არ თაკილობდა და თამაშს ასაკისთვის უჩვეულოდ კარგად კითხულობდა.
მან პაუ ტორესის შეცდომის შემდეგ დროულად დაიხია უკან, შუა მოედანში გამოასწორა კოკეს ლაფსუსი და იტალიელთა სტანდარტული მდგომარეობების დროსაც ყოჩაღობდა.
ლუის ენრიკემ გავი 82 წუთით დატოვა მოედანზე, სანამ სერხი რობერტოთი შეცვლიდა.
ესპანელთაგან ორივე გოლი „მანჩესტერ სიტის“ თავდამსხმელმა ფერან ტორესმა გაიტანა. სხვათა შორის, ტორესიც მხოლოდ 21 წლის არის.
იტალიელებმა ერთადერთი საპასუხო გოლი 83-ე წუთზე შეაგდეს. ეს „რომას“ ნახევარმცველმა ლორენცო პელეგრინიმ შეძლო.
შეგახსენებთ, რომ წუხანდლამდე „სკუადრა აძურას“ ზედიზედ 37 თამაში არ წაეგო.
