ვითომ „დაბრუნდა“ „დინამო“? ყოველ შემთხვევაში, ეროვნული ლიგის ბოლო ორი შეხვედრა ოთხბურთიანი უპირატესობით მოიგო და ეს უკვე რაღაცას ნიშნავს.
ამჯერად კახა ცხადაძის შეგირდებმა აუტსაიდერი „სამტრედია“ დაამარცხეს 5:1. მეტ-ნაკლებად თანაბარი პირველი ტაიმის შემდეგ, ძნელი წარმოსადგენი იყო ასეთი ანგარიში. ცხადია, მატჩის მსვლელობაზე შესვენების შემდეგვე სტუმარი გიორგი მჭედლიშვილის გაძევებამაც იმოქმედა, მაგრამ „დინამო“ ისედაც სჯობდა მეტოქეს და დამსახურებას ნუ დავუკარგავთ.
შეხვედრაში ორი ლამაზი და თითქმის მსგავსი გოლი გავიდა. ერთი დინამოელი დავით სხირტლაძის იყო, საჯარიმოს გარედან შორეულ კუთხეში რომ შეაგდო „ცაციათი,“ მანამდე კი სამტრედიელმა გიორგი არაბიძემ გამოიჩინა თავი ასეთივე ოსტატური დარტყმით. სხირტლაძემ „დინამოს“ მაისუროთ 10 თვის შემდეგ გაიტანა და ამასობაში დანიურ „ვიბორგში“ თამაშიც მოასწრო. არაბიძისთვის კი ეს სულაც პირველი გოლი აღმოჩნდა საქართველოს უმაღლესი ლიგის ისტორიაში.
ანგარიში ამ შეხვედრაში ზორან მარუშჩმა გახსნა. ეს სერბის მე-12 გოლი გამოდგა სეზონში და ბომბარდირთა დავაში ბათუმელ გიორგი ფანცულაიას გაუსწორდა, თუმცა მას 7 საგოლე პასი შეუსრულებია, ფანცულაიას კი – 5, ამიტომ მთავარმეგოლედაც სერბი ითვლება,
გაიმარჯვა ლიდერმა „ბათუმმაც.“ გია გეგუჩაძის გუნდის „მსხვერპლი“ ამჯერად კერკეტი „სამგურალი“ აღმოჩნდა. ზღვისპირელებმა საქართველოს ნაკრების ფეხბურთელების: ჯაბა ჯიღაურის, ვლადიმერ მამუჩაშვილისა და სანდრო ალთუნაშვილის გოლებით მოიგეს, თუმცა ისიც სათქმელია, რომ სტუმრები ბოლო 20 წუთს კაცნაკლუნი თამაშობდნენ. მსაჯმა კვირიკაშვილმა ორი ყვითლის მიზეზით მონდვრიდან ნიკა კალანდარიშვილი დაითხოვა.
ამისდაკვალად, „ბათუმი“ კვლავაც ხუთი ქულით უსწრებს „დინამოს“ და სულ უფრო ხმამაღალ განაცხადს აკეთებს ჩემპიონობაზე.
„ლოკომოტივმა“ სამმატჩიანი გაუმარჯვებელი სერია ქუთაისში დაასრულა, „ტორპედოს“ 1:0 მოუგო. ამდენივემატჩიანი მოუგებელი სერია შეწყვიტა „დილამაც,“ გორელებმა უმნიშვნელოვანესი სამი ქულა მოიპოვეს თელავში და მესამე ადგილზე დადგნენ. თუმცა „საბურთალოს“ ჯერ სათამაშო აქვს და თუ ხვიჩა შუბითიძის ბიჭები შაბათს აუტსაიდერ „შუქურას“ დაამარცხებენ, ისევ გაუსწრებენ გორელებს.
თელავი 0:2 დილა
0:1 მოსიაშვილი (45+3), 0:2 კამარა (68)
ტორპედო 0:1 ლოკომოტივი
0:1 სიხარულიძე (41)
გაძევება: მჭედლიშვილი (88) – ლოკომოტივი
ბათუმი 3:0 სამგურალი
1:0 ჯიღაური (43), 2:0 მამუჩაშვილი (51), 3:0 ალთუნაშვილი (63)
გაძევება: კალანდარიშვილი (79) – სამგურალი
დინამო 5:1 სამტრედია
1:0 მარუშიჩი (17), 1:1 არაბიძე (22), 2:1 სხირტლაძე (57), 3:1 ბენიო (59), 4:1 რადინი (72), 5:1 მოისწრაფიშვილი (79)
გაძევება: მჭედლიშვილი (48) – სამტრედია
საბურთალო 2:1 შუქურა
1:0 ტაბატაძე (10), 2:0 შულაია (86), 2:1 ინგოროყვა (90)
გუნდი თამაში მოგება ფრე წაგება ბურთები ქულა
ბათუმი 36 21 12 3 73:27 75
დინამო 36 21 7 8 59:28 70
დილა 36 17 10 9 48:35 61
საბურთალო 36 15 12 9 52:40 57
ლოკომოტივი 36 15 8 13 57:59 53
თელავი 36 12 8 16 35:53 44
სამგურალი 36 9 14 13 34:46 41
ტორპედო 36 9 13 14 38:44 40
შუქურა 36 5 12 19 28:49 27
სამტრედია 36 5 6 25 33:76 21
მეგოლეები: ზორან მარუშიჩი (დინამო), გიორგი ფანცულაია (ბათუმი) – 12, ჯაბა ჯიღაური (ბათუმი) – 10, სერგო კუხიანიძე (სამგურალი) – 9
