კრიშტიანუ რონალდუს „მანჩესტერ იუნაიტედში“ დაბრუნებას დიდი ხმაური ახლდა. იყვნენ ისეთებიც, ვისაც ეჭვი ეპარებოდა. ისინი ფიქრობდნენ, რომ პორტუგალიელის დებიუტი ამხელა აჟიოტაჟის შესაფერისი ვერ იქნებოდა და შაბათ საღამოს გარდაუვალი იმედგაცრუების წამს ელოდნენ, მაგრამ მათ რონალდუ არ ცოდნიათ. მსოფლიო ფეხბურთის დიდმა ვარსკვლავმა ჰოლივუდის დარი საღამო ოსკაროსნის ბრწყინვალებით დაამშვენა — „ნიუკალს იუნაიტედის“ კარში პირველი ორი გოლი შეაგდო და ფრთაშესხმულ თანაგუნდელებს კიდევ ორი ულამაზესი გოლის გატანის განწყობა შეუქმნა.
როგორც ინგლისური პრესა წერს, დღეს 36 წლის რონალდუ უპირველეს ყოვლისა დიდი ბომბარდირია. ის აღარ არის ბიჭი, რომელსაც 12 წლის წინ აქვე, „ოლდ ტრეფორდზე“, დიდებული გოლები გაქონდა. მან „კაჭკაჭების“ მეკარის ფრედი ვუდმანის ორი შეცდომით ისარგებლა და „იუნაიტედი“ ორჯერ დააწინაურა.
ორჯერ დააწინაურაო იმიტომ ვამბობთ, რომ რონალდუს გოლებს შორის ნიუკასლელმა ხავიერ მანკუილომ ანგარიში გაქვითა. შემდეგ კი, როგორც მოგახსენეთ, მასპინძლებმა ორი შესანიშნავი გოლი გაიტანეს. ჯერ ბრუნო ფერნანდეშმა დაარტყა საჯარიმოს მისადგომებიდან აუღებელი „ცხრიანი“, შემდეგ კი პოლ პოგბას მახვილგონივრული პასით ჯესი ლინგარდმა ანგარიში ოთხამდე გაზარდა.
შაბათ საღამოს მანჩესტერში ისეთი ამბავი ტრიალებდა, ქალაქს კოვიდის შემდეგ რომ არ უნახავს, თუმცა რაღა კოვიდის… ასეთი რამ „ოცნებათა თეატრში“ 2013 წლის შემდეგ აღარ მომხდარა — მას მერე რაც სერ ალექს ფერგიუსონმა ჩუსტები ჩაიცვა და შინ დაჯდა.
ანკი, რატომ არ უნდა ყოფილიყო აჟიოტაჟი? 2009 წელს კრიშტიანუ მანჩესტერიდან ერთი ჩემპიონთა ლიგითა და ერთი „ოქროს ბურთით“ წავიდა, 12 წლის შემდეგ ხუთი ჩემპიონთა ლიგით და ხუთი „ოქროს ბურთით“ დაბრუნდა.
დაბრუნდა და ყველაფერი ყირაზე დააყენა.
ჩრდილო-დასავლეთ ინგლისის ქალაქ მანჩესტერში მთელი დღე „ვივა რონალდუს“ სიმღერა ისმოდა.
„დაუჯერებელია, — თქვა დღესასწაულის გმირმა მატჩის შემდეგ, — თამაში რომ დაიწყო, ძალიან ვნერვიულობდი, შეიძლება არ მეტყობოდა, მაგრამ ვფიცავ, ძალიან ვღელავდი. არ ველოდი ორ გოლს თუ გავიტანდი. ერთზე ვფიქრობდი, მაგრამ ორს თუ გავიტანდი არ მეგონა.
არ უარვყოფ, გოლებმა ძალიან გამახარა, მაგრამ მთავარი გუნდია. მე „მანჩესტერ იუნაიტედს“ ვეკუთვნი. მე აქ 18 წლისა ჩამოვედი. ამ კლუბმა საოცრად მიმიღო, არაჩვეულებრივად მომეპყრო და ამიტომაც დავბრუნდი. აქ ყოფნით ვამაყობ. ცხადია, დღეს გამარჯვება მინდოდა.
ყველამ იცის, რომ ინგლისში განსხვავებულ ფეხბურთს თამაშობენ. ბევრგან მითამაშია და გულწრფელად გეტყვით: ინგლისი განსაკუთრებულია“.
შემდეგ, რონალდუს მეორე გოლზე ჰკითხეს. მან უპასუხა: „ძალიან ვნერვიულობდი. გუშინ ერთადერთი რაც მინდოდა კარგად თამაში იყო. მსურდა ხალხისთვის მეჩვენებინა, რომ გუნდისთვის ჯერაც გამოსადეგი ვარ.
„მანჩესტერ იუნაიტედს“ საოცარი გულშემატკივარი ჰყავს. მე ყველა ღონეს ვიხმარ, მათ ჩემით რომ იამაყონ. რას წარმოვიდგენდი, მთელი მატჩის განმავლობაში ჩემს სახელს თუ იმღერებდნენ. ეს იყო საოცარი დახვედრა, მაგრამ მე აქ იმისთვის ვარ, რომ გუნდს დავეხმარო და დავაბრუნო იქ, სადაც მისი ადგილია“.
