პრო დ2-ის მეორე ტურში პირველი ქართული ლელო დაფიქსირდა. საქართველოს ნაკრებისა და „ორიაკის“ მესამეხაზელმა გიორგი ცუცქირიძემ ძლიერი მეტოქე, ბასკური „ბაიონი“ გაწითლებულ დროში დაალელოვა. თუმცა გიოს ეს გაბრწყინება ერთობ დაგვიანებული გამოდგა — მისმა გუნდმა 20:28 წააგო და სანუგეშო ბონუსსაც ვერ შეწვდა.
ცუცქირიძემ თამაში შეუცვლელად ჩაატარა, ტრადიციულად შეტევაში აქტიური და დაცვაში ხისტი იყო, ზოგჯერ ზედმეტადაც კი, რის გამოც პირველი ტაიმის ბოლოს მინდვრიდან 10 წუთით მიაბრძანეს.
მის გარდა „ორიაკის“ სასტარტო რაზმში გიორგი ქართველიშვილიც იყო, ვინც 58-ე წუთზე შეცვალეს, ლუკა ნიორაძემ მეორე ტაიმი სრულად ჩაატარა, ხოლო ბორჯღალოსანი მეორეხაზელი გიორგი ჯავახია თამაშში 51-ეზე ჩაერთო. მისი სანაკრებო მეწყვილე კოტე მიქაუტაძე ასევე მარქაფიდან შევიდა მინდორზე, ოღონდ მხოლოდ დასკვნითი 18 წუთით. „ბაიონი“ კი სატურნირო ცხრილის სათავეში დარჩა.
ბექა კაკაბაძე „ოიონას“ მარქაფაში იყო და ბოლო 23 წუთი ითამაშა, მისი გუნდი კი შინ „კოლომიესთან“ 21:23 დამარცხდა და სანუგეშო ბონუსით დაკმაყოფილდა.
ვეტერანი ბორჯღალოსანი კარლენ ასიეშვილიც შეცვლაზე შევიდა, დასკვნითი 22 წუთი ირაგბა, ხოლო მისმა „რუანმა“ 5 ქულა მოიპოვა, გაანადგურა რა მაჩანჩალა „ნარბონი“ – 57:16.
ლიგაში დაბრუნებულმა კიდევ ერთმა გუნდმა ოდნავ ნაკლები, მაგრამ მაინც სამარცხვინო სხვაობით წააგო. ვაჟა კაპანაძისა და ზაურ თევდორაშვილის „ბრესანმა“ „მონ-დე-მარსანთან“ გასვლითი მატჩი 13:48 დათმო. ორივე ქართველი ბურჯი სასტარტოში იყო, ორივე 49-ე წუთზე დაასვენეს, მაგრამ ზაური 78-ეზე დააბრუნეს — შემცვლელის გაძევების გამო.
მირიან ბურდულმა „მონტობანში“ პირველად ითამაშა — 49-ე წუთიდან ბოლომდე, მისმა ახალმა კლუბმა კი შინ „კარკასონს“ 25:16 მოუგო.
ბოლოს კი ტურის ცენტრალური მატჩი გაიმართა, რომელშიც ერთმანეთს გასული სეზონის პლეი-ოფის მონაწილეები დაუპირისპირდნენ — „ვანმა“ „გრენობლს“ უმასპინძლა და 33:38 დამარცხდა. სტუმართა შემადგენლობაში 53-ე წუთზე გამოცდილი ქართველი ბურჯები გამოჩნდნენ — ზურაბ ჟვანია და ილია კაიკაციშვილი.
როგორც უკვე ითქვა, „ბაიონი“ 9 ქულით ცხრილის სათავეში დარჩა, თუმცა ამდენივე ქულა აქვს „მონ-დე-მარსანსაც“, ხოლო ორი უბონუსო მოგებითა და 8 ქულით მესამეა „კოლომიე“. მე-3 ტური მომდევნო ხუთშაბათ-პარასკევს გაიმართება.
