ბრაზილიის ფეხბურთის კონფედერაცია ექვს ინგლისურ კლუბს ებრძვის. ის მათგან კარს მომდგარი შესარჩევი მატჩებისთვის 9 ფეხბურთელის გათავისუფლებას ითხოვს.
პრემიერლიგის კლუბები გასულ კვირას არაოფიციალურად შეთანხმდნენ, რომ სანაკრებო შეკრებებზე არ გაუშვებენ იმ ფეხბურთელებს, რომლებიც covid 19-ის რუკაზე წითელ ზონაში მყოფი ქვეყნებიდან არიან. მიზეზი: ბრიტანეთში რომ დაბრუნდებიან, მათ ათდღიან კარანტინში მოუწევთ ჩაკეტვა და ჩემპიონთა ლიგის თამაშებს გამოტოვებენ.
ბრაზილიის ნაკრებს ჩილესთან, არგენტინასა და პერუსთან უწევს თამაში. ქვეყნის ფეხბურთის კონფედერაციამ ოფიციალური წერილები დაუგზავნა მანჩესტერის ორივე კლუბს, „ჩელსის“, „ლივერპულს“, „ლიდსს“ და „ევერტონს“. იმ შემთხვევაში, თუ კლუბები გაჯიუტდებიან და ფეხბურთელებს არ გაუშვებენ, ბრაზილიელები საქმეში ფიფას ჩართავენ, ფიფამ კი ინგლისელები წესით უნდა დასაჯოს.
თან, ბრაზილია დაბალი ღობე გამოდის, რადგან პრემიერლიგის კლუბების არაოფიციალური შეთანხმების მიუხედავად, „ასტონ ვილას“ მოთამაშეები ემი მარტინესი, ემი ბუენდია და „ტოტენჰემ ჰოთსპურის“ კრისტიან რომერო და ჯოვანი ლო სელსო დასხდნენ თვითმფრინავში და არგენტინის ნაკრების ბანაკისკენ გაფრინდნენ. ცხადია ეს მათ თვითნებურად არ გაუკეთებიათ, ამისი ნება „ვილას“ და „სფურზის“ ხელმძღვანელობამ დართეს.
ბრაზილიის ფეხბურთის კონფედერაცია აცხადებს, რომ „ვილა“ და „სფურზი“ სწორად მოიქცნენ და სხვა კლუბებსაც ასევე მართებთ მოქცევა.
„ლივერპულის“ მწვრთნელმა იურგენ კლოპმა ეგვიპტის ნაკრებში არ გაუშვა მო სალაჰი, რაც იმით განმარტა, რომ დაბრუნების შემდეგ, სალაჰი თვითიზოლაციაში სრული დატვირთვით ვერ ივარჯიშებს და ფორმიდან ამოვარდება.
ბრაზილიის ნაკრების მწვრთნელის ტიტეს განაცხადში არიან ლივერპულელები ალისონი, ფაბინიო და რობერტო ფირმინო, თუმცა ეს უკანასკნელი ორთავა კუნთის ტრავმის გამო შეკრებას თავისთავად გამოაკლდა.
ფიფას პრეზიდენტმა ჯანი ინფანტინომ ბრიტანეთის ხელისუფლებას მოუწოდა უცხოელი ფეხბურთელებისთვის კარანტინი შეამსუბუქოს.
