ბილბაოში, „ესტადიო სან მამესზე“, „ბარსელონამ“ მასპინძლებს გამარჯვება არ დაანება. ეს მემფის დეპაის მიერ მეორე ტაიმის დამთავრებამდე 15 წუთით ადრე გატანილი გოლის წყალობით მოხდა.
მესისშემდგომი ეპოქის „ბარსა“ ჯერ არ ჰგავს გუნდს, რომელსაც ნებისმიერ მეტოქესთან 90 წუთის განმავლობაში შეხვედრის სათავეები ხელთ ეპყრობა, მაგრამ შესვენების შემდეგ მან მოახერხა გადაჯგუფება და ინიგო მარტინესის გოლის გაქვითვა. მარტინესმა 50-ე წუთზე გახსნა ანგარიში.
კატალონიელთა მწვრთნელმა რონალდ კუმანმა ბილბაოში თამაში იმავე შემადგენლობით დაიწყო, რომლითაც ერთი კვირის წინ, ჩემპიონატის პირველ შეხვედრაში, ბასკეთის სხვა გუნდს „რეალ სოსიედადს“ დაუპირისპირდა. ეს იმას ნიშნავს, რომ ის თავდასხმაში კვლავ ანტუან გრიზმანის, მარტინ ბრაიტვაითისა და მემფის დეპაის სამეულს დაეყრდნო.
პირველ 11 წუთში ორივე გუნდს შეეძლო გოლის გატანა. ბრაიტვაითმა ხელსაყრელი პოზიციიდან ააცილა, მასპინძელმა იოან სანსეტმა კი ხარიხას გაარტყა ბურთი.
„ბილბაომ“ პრესინგს მიმართა. „ბარსელონას“ ზეწოლისგან თავის დაღწევა გაუჭირდა. სტუმრებისთვის მდგომარეობა 31-ე წუთზე გართულდა, როდესაც გამოცდილი ჟერარდ პიკე დაშავდა და რონალდ არაუხოთი შეცვალეს.
არაუხომ შესვენების შემდეგ გამოიჩინა თავი, როდესაც ბასკებს გოლის გატანაში ხელს აღარაფერი უშლიდა, მან კი დაუცველი კარიდან გამოიტანა ბურთი.
„ბილბაოს“ დაჟინებამ შედეგი მაინც მოუტანა — მეორე ტაიმის დაწყებიდან 5 წუთში კუთხურიდან თავურით გოლი შეაგდო.
ამ დროისთვის გამოჩნდა, რომ „ბარსას“ მეტოქის საჯარიმოსთან სიმწვავე აკლდა, რის გამოსასწორებლად კუმანმა ბრატივეითისა და პედრის ნაცვლად მოედანზე სერხი რობერტო და 18 წლის ავსტრიელი იუსუფ დემირი შეიყვანა.
მდგომარეობა გამოსწორდა. ჯერ ფრენკი დე იონგმა გაარტყა ძელს, შემდეგ კი დეპაიმ გაქვითა ანგარიში.
ამის შემდეგ „ბლაუგრანამ“ გამარჯვებაც სცადა. დე იონგმა და დეპაიმ საამისოდ კარგი კომბინაცია გაითამაშეს, მაგრამ ვერ გაიტანეს.
90+3 წუთზე, „ბარსელონას“ უხეშობისთვის ერიკ გარსია გაუგდეს — მან მეორე ყვითელი მიიღო. დაინიშნა ჯარიმა, რომლიდანაც ბასკებმა ბურთი სტუმრების კედელს გაარტყეს და ამით დამთავრდა კიდეც შეხვედრა.
მატჩის შემდეგ ანტუან გრიზმანმა მატჩი ასე შეაფასა: „კარგად ვერ ვითამაშეთ. მეტოქემ წნეხში მოგვაქცია. გამოჩნდა, რომ მთელი რიგი საკითხები გამოსასწორებელია. ახლა ჯობს ეს ქულა შევირგოთ და „ხეტაფესთან“ შეხვედრისთვის მოვემზადოთ“.
ფრანგს ჰკითხეს, ახლა, როდესაც მესი აღარ გყავთ, კუმანმა განსხვავებული რამ ხომ არ დაგავალათო. გრიზმანმა უპასუხა:
„მთხოვა მეტი ინიციატივა გამომეჩინა, მაგრამ მესის წასვლით ჩემთვის არაფერი იცვლება. მე ძველებურად უნდა დავეხმარო გუნდს როგორც დაცვაში, ასევე შეტევაში“.
