ასეც ხდება – სამი ქართული გუნდიდან კონფერენციის ლიგაზე არც ერთმა წააგო, თუმცა შემდეგ ეტაპზე მხოლოდ ერთი გავიდა.
ბათუმის „დინამომ“ სან მარინოს „ტრე პენე“ ორი მატჩის ჯამში 7:0 დაამარცხა და ახლა ბორისოვოს „ბატეს“ ელის.
გია გეგუჩაძის გუნდი ბელარუსებს 22 და 29 ივლისს ეთამაშება.
„გაგრას“ 0:1 ჰქონდა წაგებული ჩერნოგორიულ „სუტიესკათან“ და პირველი მატჩიდან გამომდინარე მცირე იმედი გვქონდა, თუმცა „გაგრამ“ მეორე ტაიმის დასაწყისი ჩააგდო, რითაც მეტოქემ ისარგებლა და გაიტანა. შემდეგ კი თამაშის შემობრუნება გაუჭირდა და მხოლოდ ფრეს დასჯერდა – 1:1.
გორის „დილა“ კი შინ 4-ბურთიანი დეფიციტით დახვდა სლოვაკურ „ჟილინას“. ასეთი სხვაობის აღმოხვრა კი, ქართული გუნდებისთვის წარმოუდგენელია. „დილამ“ მოიგო, მაგრამ მხოლოდ 2:1 და ევროტურნირს დაემშვიდობა.
ჯამში, შემდეგ ეტაპზე მხოლოდ ბათუმის „დინამო“ გავიდა. კონფერენციის ლიგას შეუერთდება თბილისის „დინამოც“, რომელმაც ჩემპიონთა ლიგის პირველ საკვალიფიკაციო ეტაპზე ორივე მატჩი წააგო ბაქოს „ნეფთჩისთან“.
