მსოფლიო ექვსგზის საუკეთესო ფეხბურთელმა 34 წლის ლეო მესიმ კარიერაში პირველი დიდი სანაკრებო ჯილდო მოიპოვა: არგენტინამ რიო დე ჟანეიროში, ლეგენდარულ „მარაკანაზე”, ბრაზილიის ნაკრებს 1:0 მოუგო და კოპა ამერიკას ჩემპიონი გახდა. აქამდე მესი 20-წლამდელთა მსოფლიო ჩემპიონობისა და 2008 წლის ოლიმპიადის ოქროს მედლის ამარა იყო.
ფინალში ერთადერთი გოლი ანხელ დი მარიამ გაიტანა. ის მიმდინარე ტურნირზე მეორედ იყო სასტარტო შემადგენლობაში. გოლის ავტორს გრძელი პასი „უდინეზეს” 27 წლის ნახევარმცველმა, როდრიგო დე პაულმა მიაწოდა.
დი მარიამ ზურგსუკნიდან ჩამოკიდებული ბურთი სწრაფ მოძრაობაში ერთი შეხებით მოათვინიერა, ხოლო მეორე შეხებით ის ბრაზილიელთა მეკარე ედერსონს გადაუგდო თავზე.
საფინალო სასტვენის შემდეგ, ცრემლმორეული მესი თანაგუნდელებმა მოაქციეს ალყაში, შემდეგ კი ის გუნდს დაჯილდოების ცერემონიალისკენ გაუძღვა.
ეს გამარჯვება დიდი შვება იყო არა მარტო მესისთვის, არამედ მთელი არგენტინისთვის, რომელსაც კოპა ამერიკა 1993 წლის შემდეგ არ მოეგო.
მეორე ტაიმში ბრაზილიამ ცდა არ დააკლო. მოედანზე ამაღელვებელი ფეხბურთი გაჩაღდა, მაგრამ ხუთი თავდამსხმელის მიუხედავად, მასპინძლებმა არგენტინელთა შეუვალ დაცვას ვერაფერი დააკლეს.
„სელესაოს” თავკაცმა ტიტემ შესვენებისას გუნდის ტაქტიკური ნახაზი შეცვალა. მან შეხვედრის მესამე წუთზე გაფრთხილებული ჩამშლელი ნახევარმცველის ფრედის ნაცვლად მოედანზე რობერტო ფირმინო შეიყვანა, რამაც ბრაზილიელთა შეტევას საჭირო იმპულსი შემატა.
მეორე ტაიმში იყო მომენტი, როდესაც რიჩარდსონს ეგონა რომ ანგარიში გაქვითა, რადგან ბურთი არგენტინელთა კარში შეაგდო, მაგრამ გოლი ოფსაიდის გამო არ ჩაითვალა.
ბურთს მეტწილად ბრაზილია ფლობდა (59/41) თუმცა, ეს უპირატესობა ნეიმარმა და მისმა თანაგუნდელებმა გოლად ვერა და ვერ გარდასახეს. რამდენიმე ეპიზოდში თავი გამოიჩინა „ასტონ ვილასა” და არგენტინის ნაკრების მეკარემ ემილიანო მარტინესმა.
მესიმ ტურნირზე ოთხი გოლი გაიტანა რაც იმას ნიშნავს, რომ „პორტუს” კოლუმბიელ გარემარბ ლუის დიასთან ერთად საუკეთესო ბომბარდირი გახდა. არგენტინელს ტურნირის საუკეთესო ფეხბურთელის წოდებაც გასაყოფი გაუხდა — კონმებოლმა მასთან ერთად საუკეთესოდ ბრაზილიელი ნეიმარი დაასახელა.
საკუთრივ ფინალი არგენტინელთა კაპიტნისთვის საუკეთესო მატჩი ნამდვილად არ ყოფილა. გარდა ამისა, მან ერთი შესანიშნავი შესაძლებლობაც გაუშვა ხელიდან, მაგრამ საბოლოოდ ყველაფერი ალბისელესტეს სასარგებლოდ დასრულდა. არგენტინელებმა კოპა ამერიკა მეთხუთმეტედ მოიგეს.
ლიონელ სკალონის ხელმძღვანელობით არგენტინამ უკვე ზედიზედ 20 მატჩია მარცხი რა არის არ იცის, ბრაზილიამ კი 2018 წლის მუნდიალის მეოთხედფინალის შემდეგ (1:2 ბელგიასთან) პირველად წააგო.
