ესპანეთში გავრცელებული ცნობების თანახმად, „ბარსელონას” იმდენად სავალალო ფინანსური მდგომარეობა აქვს, რომ ამ ზაფხულს შეძენილ ფეხბურთელებს რეგისტრაციას ვერ უკეთებს.
„გოლი” წერს, რომ კატალონიურმა კლუბმა „ლა ლიგის” სახელფასო ლიმიტი ამოწურა და ოფიციალურად ვერც სერხიო აგუეროს იფორმებს, ვერც მემფის დეპაის და ვერც 20 წლის ერიკ გარსიას, რომელიც „მანჩესტერ სიტიდან” დაუბრუნდა.
პრეზიდენტ ჟოან ლაპორტას ახალი მოთამაშეების ძებნა მეტწილად თავისუფალ აგენტებს შორის უწევს. ეს ის ხალხია, ვისაც ან დიდი ხელფასი აქვს და ძველი კლუბი მის მოშორებაზეა ან ვინც უბრალოდ ვერ მოერგო ამა თუ იმ გუნდს.
ამას დაამატეთ, რომ კონტრაქტის გარეშე დარჩა ლეო მესიც. მის ძველ ხელშეკრულებას ვადა 30 ივნისს ამოეწურა. მართალია, არგენტინელთან მოლაპარაკებები მიმდინარეობს და სავარაუდოდ ის არსად წავა, მაგრამ ფაქტია, რომ მისი ხელახალი რეგისტრაციისთვის „ლა ლიგის” სალაროსთან შექმნილი პრობლემის მოგვარებაა საჭირო.
თანხების მოსაძიებლად, „ბარსელონა” ფეხბურთელების ნაწილის გაშვებას ცდილობს. ზოგ შემთხვევაში ეს თავად მოთამაშის სურვილს ემთხვევა, ზოგ შემთხვევაში კი კლუბსაც და ფეხბურთელსაც ხელფასების შეკვეცის აუცილებლობა აიძულებს ასეთი ნაბიჯის გადადგმას.
მაგალითად, ჟუნიორ ფრიპო „ლიდს იუნაიტედში” გადასვლასთან არის ახლოს. პრემიერლიგის კლუბი 25 წლის მარცხენა მცველში მხოლოდ 15 მილიონ ევროს იხდის, მაგრამ ეს ტრანსფერი „ბარსას” წელიწადში 9,3 მილიონს დაუზოგავს.
ფრანსისკო ტრინკაოც ინგლისის გზას ადგას. მას „ვულვზი” აიყვანს იჯარით და კონტრაქტში გამოსყიდვის უფლებასაც ჩაიწერს. ტრინკაო 21 წლის გარემარბია.
19 წლის გარემარბი კონრად დე ლა ფუენტე „ბარსელონამ” „მარსელს” მიჰყიდა, 21 წლის ცენტრალური მცველი, ფრანგი ჟან-კლერ ტოდიბო კი „ნიცაში” გადავიდა. ამ ორი ახალგაზრდის გასხვისება კატალონიელებს ჯამში წლიურ 10,8 მილიონს დაუზოგავს.
23 წლის ბრაზილიელმა მცველმა მატეუს ფერნანდეშმა მოულოდნელად აღმოაჩინა, რომ „ბარსელონამ” მისი კონტრაქტი გააუქმა და ახლა სასამართლოში ჩივის, რათა კლუბს კომპენსაცია გამოართვას.
აქამდე ჩამოთვლილები ძირითადად უცნობი ფეხბურთელები იყვნენ, სამუელ უმტიტის, ფილიპე კოუტინიუსა და მირალემ პიანიჩის ტრიო კი საქვეყნოდ არის ცნობილი და მათი გასხვისება სახელფასო ფონდს 200 მილიონი ევროთი შეამსუბუქებს.
წერენ, რომ ეს ყველაფერი დიდწილად მესის ხელფასის მოსაძიებლად კეთდება.
მომდევნო სეზონი აგრეთვე დიდი გამოცდა იქნება ჰოლანდიელი მწვრთნელისთვის რონალდ კუმანისთვის, რომლის ხელმძღვანელობით „ბარსამ” გასულ სეზონში, ლა ლიგაში, მხოლოდ მესამე ადგილი დაიკავა ორი მადრიდული გუნდის, „ატლეტიკოსა” და „რეალის” შემდეგ. ცხადია, ნებისმიერი ფეხის დაცდენა კუმანს თანამდებობად დაუჯდება.
