პარასკევს საქართველოს მორაგბეთა ნაკრები ისტორიულ მატჩს გამართავს. აქამდე ბორჯღალოსნებს არასდროს უთამაშიათ მსოფლიოს მოქმედ ჩემპიონთან მსოფლიო თასს მიღმა.
გარდა ამისა, ხაზგასასმელია ის ფაქტიც, რომ 2019 წლის ნოემბრის, ანუ მსოფლიო თასის ფინალური მატჩის შემდეგ სამხრეთ აფრიკის ნაკრებს ოფიციალური მატჩი ჯერაც არ უთამაშია და ბორჯღალოსნებთან ჯახი მათთვის ამ მხრივ განსაკუთრებულ მნიშვნელობას ატარებს – მომდევნო მსოფლიო ფორუმამდე 2 წელიწადზე იდნავ მეტია დარჩენილი, გუნდი კი ამდენი ხნის უთამაშებელია, მიუხედავად იმისა, რომ მას ახალი დამრიგებელი კარგა ხანია ჰყავს.
„ქურციკების“ ახალმა გურუმ ჟაკ ნიენაბერმა სასელექციო სამუშაოებით თავი მაინცდამაინც არ შეიწუხა და 2 ივლისს 21 საათზე, პრეტორიის სტადიონ „ლოფტუს ვესტერლოზე“ ბორჯღალოსნებს ერთბაშად 13 მსოფლიო ჩემპიონს დაუპირისპირებს, ხოლო მარქაფაში საჩემპიონო შემადგენლობის კიდევ 5 წარმომადგენელი იქნება!
თანაც ნურავინ იფიქრებს, რომ სამხრეთაფრიკელი მორაგბეები სათამაშო პრაქტიკას რამენაირად მოკლებულები არიან. თუკი ნაკრები 1,5 წელია უქმობს, ცალკეული მოთამაშეები ევროპულ კლუბებსა და ადგილობრივ ფრენჩაიზებში რეგულარულად მონაწილეობენ ტოპ 14-ის, პრემიერშიპისა თუ ქარის თასის მატჩებში.
მოკლედ, „ქურციკები“ ბორჯღალოსნებს სრულ მზადყოფნაში ხვდებიან. საქართველოს ნაკრებში კი დიდ საკადრო პრობლემებს განიცდის. ის არ კმაროდა, რომ ტრავმების ნამდვილი ეპიდემია დაგვატყდა თავს, ამას კორონავირუსიც დაემატა და რამდენიმე ჩვენებური ჯერაც ვერ ჩამდგარა ფორმაში დაავადების დამარცხების შემდეგ.
მარქაფაში დებიუტანტიც კი გვყავს – „ბრივის“ ბურჯი ლუკა ჯაფარიძე, რომელსაც U20 ნაკრებში დამაჯერებელი გამოსვლებით ვიცნობთ. და მთლიანობაშიც, ხსენებულ მიზეზთა გათვალისწინებით, ქართველთა შემადგენლობა მნიშვნელოვნადაა გადახალისებული. თუმცა, რაცაა ესაა, ლევან მაისაშვილს მაინცდამაინც დიდი არჩევანი არ ჰქონია და ამ ეტაპზე ესაა ჩვენი ნაკრების ოპტიმალური შემადგენლობა.
ასეა თუ ისე, ჩვენს ბიჭებს წარმატებას ვუსურვებთ. მოგებას, ცხადია, ვერავინ მოვთხოვთ, მაგრამ ღირსეული წინააღმდეგობის იმედი ნამდვილად გვაქვს.
საქართველოს ნაკრების შემადგენლობა სამხრეთ აფრიკის ნაკრებთან მატჩისთვის
- გურამ გოგიჩაშვილი (22 კეპი, 10 ქულა), 2. ჯაბა ბრეგვაძე (66, 25), 3. გიორგი მელიქიძე (28, 15), 4. დავით გიგაური (11, 5), 5. კოტე მიქაუტაძე (67, 10), 6. გიორგი ცუცქირიძე (21, 15), 7. ბექა საღინაძე (21, 15), 8. თორნიკე ჯალაღონია (9, 10), 9. ვასილ ლობჟანიძე (58, 50), 10. თედო აბჟანდაძე (25, 162), 11. დემურ თაფლაძე (9, 5), 12. მერაბ შარიქაძე (კაპიტანი, 77, 60), 13. გიორგი კვესელაძე (34, 25),14. აკაკი ტაბუცაძე (12, 55), 15. დავით ნინიაშვილი (6, 20).
მარქაფა
16. გიორგი ჭყოიძე (16, 5), 17. ნიკოლოზ ხატიაშვილი (5, 0), 18. ლუკა ჯაფარიძე (0, 0), 19. ნოდარ ჭეიშვილი (31, 0), 20. გიორგი ჯავახია (6, 5), 21. გელა აფრასიძე (34, 24), 22. გიორგი ბაბუნაშვილი (3, 9), 23. ილია სპანდერაშვილი (1, 0).
