90-იანი წლების ცნობილმა ინგლისელმა თავდამსხმელმა იან რაიტმა კრიშტიანუ რონალდუს ფენომენალურ ჯარიმებს მითი უწოდა — ევრო 2020-ის მერვედფინალში, სადაც პორტუგალიამ ბელგიასთან 0:1 წააგო, რონალდუმ სტანდარტული მდგომარეობიდან კვლავ ვერ გაიტანა.
პორტუგალიელთა ლიდერმა თამაშზე დიდი გავლენაც ვერ იქონია, თუმცა საჯარიმო დარტყმით თავის გამოჩენის შესაძლებლობა ორჯერ მიეცა. რაიტმა, რომელიც ITV-ს ექსპერტად იყო მიწვეული, მსოფლიოს ხუთგზის საუკეთესო მოთამაშის ჯარიმებზე ასე თქვა:
„მოდი, ფაქტებით ვილაპარაკოთ. რამდენ საჯარიმოს არტყამს რონალდუ და მათგან რამდენი გოლი გააქვს? ამასწინათ წავიკითხე, რომ მისი შედეგიანობა არის 50 დარტყმიდან ერთი. ასე რომ, რონალდუს გამანადგურებელი ჯარიმები მითია. უყურეთ მას და ნახავთ, რომ როდესაც ჯარიმას დაარტყამს, არაფერი მოხდება”.
რაიტის არსენალელმა თანაგუნდელმა პატრიკ ვიეირამ საკითხს ცოტა სხვანაირად შეხედა: „დღეს, რონალდუს ტიბო კურტუამ აუღო. როდესაც კარში კურტუა დგას, ჩვენ ყველანი ველით, რომ ის საჯარიმო დარტყმას მოიგერიებს. აი, ახლაც, კურტუას რონალდუს დარტყმა რომ გაეშვა, თავადვე ჩათვლიდა, რომ ცუდად ითამაშა, არადა, მან ბურთი შესანიშნავად მოიგერია”.
რაიტმა ამაზე უპასუხა: „დღევანდელ დარტყმაზე ამბობ? იმ ეპიზოდში კურტუას საკმარისად ჰქონდა დრო, ბურთის მიმართულება კარგად რომ დაენახა. პლუს, პრობლემა რონალდუშია. ვიმეორებ, მას სულაც არ გააქვს ბევრი ჯარიმა”.
ის ეპიზოდი, რომელსაც იან რაიტი და პატრიკ ვიეირა არჩევდნენ, პირველ ტაიმში იყო. შესვენების შემდეგ კი რონალდუს კიდევ ერთხელ მიეცა საჯარიმო დარტყმით გუნდის გადარჩენის შესაძლებლობა, მაგრამ ბურთი ცოცხალ კედელს მოარტყა.
სტატისტიკა ასეთია: კრიშტიანუ რონალდუ ევროპის ჩემპიონატებზე პირველად 2004 წელს გამოჩნდა და მას მერე, ევროებზე, 28 ჯარიმა დაარტყა, რაც სხვა ვარსკვლავების მცდელობებზე ოთხჯერ მეტია. ევროებზე დარტყმული ჯარიმების რაოდენობით რონალდუს 7 დარტყმით მოსდევენ ანდრეა პირლო, დარიო სრნა, დეკუ და კიდევ სამი ფეხბურთელი. და რაც მთავარია, კრიშტიანუს ამ 28 დარტყმიდან ერთიც არ გაუტანია.
და მაინც, კრიშტიანუ რონალდუს კარიერაში საჯარიმო დარტყმები ბრწყინვალედაც შეუსრულებია. ასე მაგალითად, დაუვიწყარია მისი საჯარიმო დარტყმა 2018 წლის მუნდიალზე, პორტუგალიის და ესპანეთის შეხვედრაში, რომელიც 3:3 დასრულდა.
