ინგლისის ნაკრების ხელმძღვანელებმა სასწრაფოდ უნდა იღონონ რამე: მას მერე, რაც შოტლანდიელ ბილი გილმორს covid 19 აღმოაჩნდა, ისინი სულ მცირე იმაში მაინც უნდა დარწმუნდნენ, რომ მათ გუნდში ყველა ჯანმრთელად არის.
შეგახსენებთ, რომ 18 ივნისს, „უემბლიზე”, ინგლისისა და შოტლანდიის ნაკრებებმა 0:0 ითამაშეს, ორიოდ დღეში კი გაირკვა, რომ სქოთ გილმორს კორონავირუსი სჭირს.
გილმორი ათდღიან თვითიზოლაციაშია და D ჯგუფის ბოლო ტურის შეხვედრას, ხორვატიის ნაკრების წინააღმდეგ, ტელევიზორში ნახავს. ცნობილი არ არის, როდის დაავადდა შოტლანდიელი, მაგრამ თუ ის ინგლისელებთან თამაშის დროს უკვე ავად იყო, არ არის გამორიცხული, რომ სხვაც დაეავადებინა.
ორშაბათს, ინგლისის ნაკრების ბანაკში ჩატარებულმა ტესტებმა კოვიდიანი ვერავინ გამოავლინა, მაგრამ არავინ იცის რა მოხდება მომავალში.
ფაქტია, რომ ბილი გილმორმა მატჩის შემდეგ „ჩელსის” ბიჭები, თავისი თანაკლუბელები, ბენ ჩილველი და მეისონ მაუნტი ნახა და გადაეხვია.
რამდენადაც ცნობილია, კოვიდის საინკუბაციო პერიოდი 14 დღემდეა, ასე რომ ჩილველს ან მაუნტს სიმპტომები შეიძლება ორი კვირის შემდეგ გამოუმჟღავნდეთ.
აღსანიშნავია, რომ თვითიზოლაციაში მყოფ გილმორს არაფერი აწუხებს. მისთვის კოვიდი შოტლანდიაში რომ დაედგინათ, იქაური წესების თანახმად მთელს გუნდს კარანტინში მოუწევდა გადასვლა.
შოტლანდიის ფეხბურთის ასოციაცია ვარაუდობს, რომ გილმორს თანაგუნდელებთან ახლო კონტაქტი არ ჰქონია. კაცმა რომ თქვას, ჩილველი და მაუნტიც არ ითვლებიან ახლო კონტაქტებად, რადგან გილმორთან ახლოს 15 წუთზე ნაკლებ ხანს იყვნენ.
