საფრანგეთის მეორე ელიტური ლიგის, პრო დ2-ის ფინალისტმა „ბიარიცმა“ უდრამატულეს მატჩში ტოპ 14-ში ბოლოსწინა ადგილზე გასული „ბაიონი“ დაამარცხა და მრავალწლიანი პაუზის შემდეგ საფრანგეთის მთავარ სარაგბო ლიგაში დაბრუნდა.
„ბიარიცი“ უდიდესი ტრადიციების კლუბია, რომელიც საფრანგეთის ჩემპიონიც ყოფილა და ევროპის ჩემპიონთა თასის მფლობელიც. მაგრამ ბოლო წლებში ბასკური კლუბი ფინანსურ და მასთან ერთად სპორტულ კრიზისში იმყოფებოდა. ეს გრძელდებოდა იმ დრომდე, სანამ კლუბის ხელმძღვანელობა ერთბაშად რამდენიმე ახალგაზრდა და ნიჭიერ ქართველს არ მოიწვევდა. შესაძლოა, მავანმა ეს დამთხვევად მიიჩნიოს, მაგრამ ფაქტი ფაქტად რჩება და ამას ვერსად გავექცევით.
საქართველოს 20-წლამდელთა ნაკრებში გამოზრდილ-დაფრთიანებულმა ქართველმა ტალანტებმა თავადაც განიცადეს საგრძნობი პროგრესი ბასკეთში თამაშისას და გუნდსაც უდიდესი სამსახური გაუწიეს. გასულ სეზონში „ბიარიცის“ ღირსება ოთხმა (!) ჩვენებურმა ბურჯმა დაიცვა – 22 წლის გიორგი ნუცუბიძემ (20 მატჩი), 21 წლის ლუკა აზარიაშვილმა (21 მატჩი), 23 წლის უშანგი ჭეიშვილმა (21 მატჩი) და ერთადერთმა გამოცდილმა ბიარიცელმა ქართველმა, 28 წლის ვახტანგ ახობაძემ (14 მატჩი).
ყველაზე წარმატებული სეზონი კი ბორჯღალოსან მესამეხაზელ თორნიკე ჯალაღონიას ჰქონდა. „შემოდგომის ერთა თასზე“ გაბწყინების შემდეგ, 22 წლის უნიჭიერესმა ფორვარდმა კლუბში თამაში ფაქტობრივად მეორე წრიდან დაიწყო და 15 მატჩში 3 ლელოს გატანაც მოახერხა.
ახლა რაც შეეხება მომავალ სეზონს: უშანგი ჭეიშვილს „ბიარიცში“ იჯარა დაუმთავრდა და ის „მონპელიეში“ ბრუნდება, ხოლო დანარჩენ ოთხ ქართველს ტოპ 14-ში „ბიარიცთან“ ვიხილავთ.
რაც შეეხება ტოპ 14-ის საგზურისთვის შეხვედრას, ის რაგბისთვის უჩვეულო ანგარიშით დასრულდა – 3:3. უფრო ზუსტად რომ ავხსნათ, ამ ანგარიშით მატჩის ძირითადი 80 წუთი დასრულდა, რის შემდეგაც ორი 10-წუთიანი ექსტრატაიმი დაინიშნა.
„ბიარიცი“ ჯარიმით უმალ დაწინაურდა – 6:3, მაგრამ „ბაიონმა“ დამატებითი დროის მიწურულს კვლავ გაათანაბრა – 6:6.
ამის შემდეგ კი დადგა არეკნების სერიის ჯერი, რომელიც ბიარიცელებმა უკეთ შეასრულეს და ევროპის საუკეთესო ლიგაში ადგილიც დაისაკუთრეს.
„ბაიონს“ პრო დ2-ში სამი ქართველი ჩაჰყვება – 29 წლის მეორეხაზელი ბორჯღალოსანი კოტე მიქაუტაძე (17 მატჩი, 1 სინბინი), „ტულონიდან“ ახლახან მისული 20 წლის ბურჯი ლუკა ჭელიძე (10 მატჩი) და 21 წლის მეორეხაზელი ლადო ჩაჩანიძე, ხოლო მისი თანატოლი მესამეხაზელი იოანე იაშაღაშვილი მომავალ სეზონს ერთწლიანი იჯარით პრო დ2-ისვე „კარკასონში“ გაატარებს.
რა ხდება ტოპ 14-ის პლეი-ოფში?
და ორიოდე სიტყვაც ტოპ 14-ის პლეი-ოფსაც შევაწიოთ. შესარჩევ ნახევარფინალში პარიზული დერბი შედგა, რომელშიც „რასინგ-92“-მა „სტად ფრანსეს“ იოლად, 38:21 სძლია. რასინგელ გურამ გოგიჩაშვილსა და გია ხარაიშვილს ამ მატჩში მონაიწილეობა არ მიუღიათ, ხოლო დამარცხებულთა სასტარტოში ვასილ კაკოვინი იყო, ვინც 44-ე წუთზე შეცვალეს, ხოლო გიორგი მელიქიძეს მხოლოდ დასკვნითი 5 წუთი ანდეს.
ნახევარფინალში ასევე „ბორდოც“ გავიდა, რომელმაც „კლერმონს“ 25:16 აჯობა. ბორდოელთა შემადგენლობაში ერთადერთი ქართველი ვიხილეთ – ბორჯღალოსანი ლექსო ყაულაშვილი თამაშში 74-ე წუთზეღა ჩართეს, როცა მატჩის ბედი გადაწყვეტილი იყო.
ამრიგად, ნახევარფინალში „ტულუზი“ სწორედ „ბორდოს“ უმასპინძლებს, ხოლო „ლა როშელი“ – „რასინგ-92“-ს. ეს ნიშნავს, რომ საქართველოს ნაკრებში მოხვედრის კანდიდატებს – ლაშა ტაბიძეს, ლექსო ყაულაშვილს, გურამ გოგიჩაშვილსა და გია ხარაიშვილს სეზონი სულ ცოტა ერთი კვირით გაუხანგრძლივდათ და ნიდერლანდებთან მათი თამაში ნაკლებადაა მოსალოდნელი.
