რობერტო მანჩინი ამბობდა, ევრო 2020-ზე ჩემი გუნდი ერთ-ერთი უძლიერესთაგანი იქნებაო და პირველივე შეხვედრაში დამტკიცდა, რომ სიტყვის კაცი ყოფილა. „სკუადრა აძურამ” თურქეთის მობილიზებულ გუნდს 3:0 მოუგო.
პირველი გოლი უიღბლო მერიჰ დემირალმა თავის კარში შეაგდო (ბედის ირონიაა, რომ დემირალი „იუვენტუსის” ფეხბურთელია), მეორე ჩირო იმობილემ მკვლელი დარტყმით გაიტანა, ხოლო მესამე ლორენცო ინსინიემ დაამატა.
პირველი მატჩის ნახვის შემდეგ დაბეჯითებით შეიძლება ითქვას, რომ 16 ივნისს შვეიცარიას და 20 ივნისს უელსს საკუთარ თავზე გადახტომა მოუწევთ იტალიელთა ასეთ მანქანას წინააღმდეგობა რომ გაუწიონ.
ის, რომ იტალია 2018 წლის მსოფლიოს ჩემპიონატზე ვერ მოხვდა, ბევრმა ამ ქვეყნის ფეხბურთისა და ნაკრების დასუსტებად მიიჩნია, მაგრამ შეცდა. დიდ, ტრადიციულ საფეხბურთო ქვეყანას შეიძლება ჩავარდნა ჰქონდეს, მაგრამ ისე არასდროს დაჩიავდება, სათავლავში ჩასაგდები რომ აღარ იყოს. მანჩინიმ „სკუადრა აძურა” ისეთ გუნდად დააყენა, რომ ევროპის ჩემპიონატის პირველ შეხვედრაში, დაუსრულებელი მაღალი პრესინგითა და ინტენსიური შეტევებით საყოველთაო ყურადღება მიიპყრო.
ინგლისელ კოლეგებს დავესესხებით: მანჩინის ისეთი გუნდი შეუქმნია, რომლის ყველა ფეხბურთელი ბავშვივით თამაშობს. მათი თითოეული გარბენა საკონდიტროში მივარდნას და შინ ბედნიერი სახით დაბრუნებას ჰგავდა.
მატჩის საუკეთესო მოთამაშედ „რომას” 28 წლის ნახევარმცველი ლეონარდო სპინაცოლა დაასახელეს. რობერტო მანჩინიმ კი პრეს კონფერენციაზე ქვა:
„კარგად ვითამაშეთ. მართალია, შესვენებამდე გოლი ვერ გავიტანეთ, მაგრამ ამას თავისი ახსნა აქვს — ჯერ ერთი ეს იყო პირველი მატჩი და მეორეც, თურქეთის ნაკრები ძლიერი გუნდია.
ასეთ შეხვედრებში გამარჯვებისთვის ბევრი რამ გჭირდება. მაგალითად, ჩვენ შინ ვთამაშობდით და გულშემატკივარი გვამხნევებდა.
ძალიან მნიშვნელოვანი იყო, რომ როდესაც მთელი გუნდით სწრაფად ვიხევდით უკან, წინ ვიღაცას ყოველთვის ვტოვებდით თავისუფალს.
თამაშითა და შედეგით თავადაც კმაყოფილები ვართ, სტადიონზე შეკრებილი მაყურებელიც კმაყოფილი დარჩა და მთელმა იტალიამაც გაიხარა.
შესანიშნავი საღამო იყო. იმედი მაქვს ასეთი საღამოები კიდევ გვექნება.
„უემბლი”? იქამდე ჯერ შორია. „უემბლის” ჯერ ექვსი თამაში გვაშორებს”.
