ედენ აზარმა „რეალის” მწვრთნელად კარლო ანჩელოტის დანიშვნა სიხარულით მიიღო.
ბელგიელ ვარსკვლავს 27 მაისს გადამდგარ ზინედინ ზიდანთანაც ჩინებული ურთიერთობა ჰქონდა, მაგრამ ის ფიქრობს, რომ მისთვის ანჩელოტიც შესანიშნავი ხელმძღვანელი იქნება.
„მადრიდში ყველამ კარგად იცის, თუ რა შესძინა ანჩელოტიმ თავის დროზე „რეალს”, — თქვა აზარმა RTBF-თან ინტერვიუში, — მან ამავე ფეხბურთელებით ჩემპიონთა ლიგა მოიგო. ის „სანტიაგო ბერნაბეუზე” ბევრს ძალიან კარგად იცნობს. ანჩელოტი უდიდესი გამოცდილების მწვრთნელია. ის ქალაქსაც იცნობს და ფანებსაც. ვფიქრობ, ერთად დიდ საქმეს გავაკეთებთ.
მე მას პირადად არ შევხვედრივარ, მაგრამ რამდენადაც ბიჭებისგან ვიცი, ძალიან კარგი ადამიანია, რომელსაც გამარჯვების დაუოკებელი წყურვილი ახასიათებს. ჩვენც სწორედ ეს გვინდა.
მიხარია, კარლო ანჩელოტისთან მუშაობის შანსი რომ მომეცემა. ეს ჩემთვის ძალიან კარგი ამბავია”.
მოგეხსენებათ, ანჩელოტი 2009-11 წლებში „ჩელსის” თავკაცი იყო, „ჩელსი” კი ის კლუბია, სადაც აზარი შვიდი წელიწადი ციდან ვარსკვლავებს წყვეტდა, მაგრამ ოდნავ მოგვიანებით, 2012-2019 წლებში. ასე რომ, იტალიელი მწვრთნელი და ბელგიელი ფეხბურთელი ერთმანეთს არ იცნობენ.
ზინედინ ზიდანის შესახებ კი აზარმა ასე თქვა: „მასთან ყოველდღიური ურთიერთობა და თანამშრომლობა დიდებული იყო. იმას რა სჯობს, შენი კერპი რომ გწვრთნის”.
