„ბარსელონას” პრეზიდენტმა ჟოან ლაპორტამ პრეს-კონფერენცია მოაწყო, სადაც კლუბში და მის გარშემო შექმნილ სიტუაციაზე ილაპარაკა, მაგრამ მწვრთნელის რონალდ კუმანის შესახებ დაზუსტებით არაფერი უთქვამს.
მისი სიტყვები გახლდათ: „უდიდესი პატივისცემა და აღფრთოვანება კუმანს, რომლის კონტრაქტიც ჯერ კიდევ მოქმედებს. ჩვენ გადავწყვიტეთ მომდევნო კვირაში კვლავ შევხვდეთ ერთმანეთს და მის მომავალზე დავილაპარაკოთ. დღეს ერთად ვაფასებთ განვლილ სეზონს. როგორც მოგახსენეთ, მას კლუბთან კონტრაქტი აქვს და ჩვენ პირდაპირ ვუკავშირდებით ერთმანეთს. ახლა ვაწარმოებთ მოლაპარაკებებს, რათა გავიგოთ რა იდეები გვაქვს საერთო. ვფიქრობ, საინტერესო გზაზე ვდგავართ”.
ლაპორტას ჩავის შესახებაც ჰკითხეს. ჩავიზე ამბობენ, რომ ის კუმანის შემცვლელად მოიაზრება. ამ კითხვაზე პასუხის დროს პრეზიდენტმა კვლავ ახსენა ჰოლანდიელი:
„კუმანის თანამდებობაზე დარჩენას ნუ გამორიცხავთ”, — თქვა მან.
ჟოან ლაპორტას კომენტარები არ მოეწონა სააგენტო „ვასერმანს”, რომლის კლიენტიც გახლავთ კუმანი — ფეხბურთელობის წლებში, „ბარსას” შემადგენლობაში ოთხგზის ესპანეთის ჩემპიონი და ჩემპიონთა თასის (ახლანდელი ლიგა) მფლობელი.
„ვასერმანმა” გამოაქვეყნა ტვიტი, რომელიც მართალია მალე წაშალა, მაგრამ შეუმჩნეველი არ დარჩენილა. ტვიტში ეწერა:
„წარმოიდგინეთ: მინდა ცოლად შეგირთო, მაგრამ ეჭვი მღრღნის. მომეცი ორი კვირა, იქნებ უკეთესი საცოლე ვიპოვო. თუ ვერ ვიპოვი, მაშინ აუცილებლად დავქორწინდებით”.
როგორც ჩანს, ის, რაც „ბარსელონას” პრეზიდენტმა კუმანს ამასწინდელი შეხვედრის დროს უთხრა, არსებითად იმავე შინაარსის ტექსტი იყო, რაც „ვასერმანის” ირონიულ ტვიტში ეწერა.
