„მანჩესტერ სიტის” შემადგენლობაში პრემიერლიგური კარიერის უკანასკნელი მატჩის წინ სერხიო აგუეროს საპატიო დერეფანი მოუწყვეს, რაც ქვემოთ, ვიდეოზე შეგიძლიათ ნახოთ. 65-ე წუთზე კი არგენტინელი ვეტერანი მოედანზე შევიდა და ორი გოლი გაიტანა. მისმა „სიტიმ” „ევერტონს” 5:0 მოუგო.
ათწლიანი ერთგულების შემდეგ, 32 წლის თავდამსხმელმა „ეტიჰედ სთედიუმი” დატოვა.
ამ ხნის განმავლობაში, აგუერომ „ქალაქელებს” ინგლისის ჩემპიონის ხუთი ტიტული მოაგებინა. განსაკუთრებით აღსანიშნავია მის მიერ გატანილი ისტორიული გოლი „ქუინზ პარკ რეინჯერსის” კარში, რომლის წყალობითაც „სიტი” 2011-12 წლების სეზონში პირველად გახდა პრემიერლიგის ჩემპიონი. ძველი პირველი ლიგის ტიტულს მანჩესტერის ეს გუნდი ორჯერ ფლობდა, 1936-37 და 1967-68 წლების სეზონებში.
არგენტინელი ვარსკვლავი, რომელიც „სიტიმდე” მადრიდის „ატლეტიკოში” თამაშობდა, ინგლისური გუნდის შემადგენლობაში 389-ჯერ გავიდა მოედანზე და 260 გოლი შეაგდო. მათ შორის 275 მატჩი და 184 გოლი პრემიერლიგაზე მოდის.
დარჩა ერთადერთი შეხვედრა — 29 მაისს ჩემპიონთა ლიგის ფინალია. ათამაშებს პეპ გვარდიოლა აგუეროს ამ დღეს? შეძლებს, მოედანზე მის თუნდაც ცოტა ხნით შეშვებას?
საბედნიეროდ, როდესაც „სიტის” ფეხბურთელებმა „ევერტონთან” შეხვედრის წინ კლუბის აწ უკვე ლეგენდას საპატიო დერეფანი მოუწყვეს, ამ ამბავს ტრიბუნიდან 10 000 მაყურებელი ადევნებდა თვალს. კოვიდეპიდემიის შემდეგ, „ეტიჰედს” გულშემატკივარი დაუბრუნდა.
აღსანიშნავია, რომ არგენტინელის მეორე გოლი „ევერტონის” კარში სარეკორდო გახლდათ. მანამდე, პრემიერლიგაში, ერთი კლუბის მაისურით ყველაზე მეტი გოლი უეინ რუნის ჰქონდა გატანილი.
მატჩის დამთავრების შემდეგ, პეპ გვარდიოლამ თქვა: „ის ჩვენთვის საგანგებო პიროვნებაა, რომლის შეცვლაც გამორიცხულია. სერხიო ჩვენ ყველას ძალიან გვიყვარს. მან თავისი მაღალი კლასი იმ 30 წუთში გვაჩვენა, რაც მოედანზე დაჰყო”.
თავად აგუერომ კი Sky Sports-ს უთხრა: „თამაშის დაწყების წინ თავს უცნაურად ვგრძნობდი და ეს არ იყო კარგი გრძნობდა. ჯობს კარგი მომენტები გავიხსენო.
მინდა დიდი მადლობა გადავუხადო ჩემს თანაგუნდელებს. ისინი ძალიან დამეხმარნენ.
მე თავდამსხმელი ვარ. ჩემი საქმე გოლების გატანაა. ამიტომაც, დღეს, გამოსათხოვარ შეხვედრაში ორი გოლი რომ გავიტანე თავს საუცხოოდ ვგრძნობ.
„მანჩესტერ სიტიში” ჩემთვის ყველაზე მნიშვნელოვანი ტიტული პირველი ჩემპიონობა გახლდათ. ის კლუბისთვისაც ყველაზე მნიშვნელოვანი იყო.
მას მერე გუნდმა ტიტულის ტიტულზე მოგება დაიწყო, რაც ძალიან საამაყოა, რადგან ათ წელიწადში ამდენი გამარჯვება იოლი საქმე არ არის”.
ცხადია, არგენტინელმა ვარსკვლავმა საგანგებო მადლობა გადაუხადა ფანებსაც.
და ახლა, სერხიო აგუერო ორი წლით „ბარსელონაში” გადავა. მის ნაცვლად „სიტი” შეეცდება „ტოტენჰემ ჰოთსპურიდან” ჰარი კეინი გადაიბიროს.
