საფრანგეთის მეორე ელიტურ ლიგა პრო დ2-ში პლეი-ოფის დრო მოვიდა და შაბათს პირველი წრის ორივე მატჩიც გაიმართა. ეს იყო ე. წ. შესარჩევი ნახევარფინალი, რომლის გამარჯვებულებიც „ნამდვილ“ ნახევარფინალში რეგულარულის გამარჯვებულსა და მეორეადგილოსანს შეხვდებიან.
ისე მოხდა, რომ შაბათის მატჩების მონაწილე გუნდებშისულ ცოტა ერთმა ქართველმა ითამაშა. და ისე მოხდა, რომ წაგებულთა შორის პრესტიჟის ლელოები ჩვენებურებმა გაიტანეს.
თავდაპირველად ერთმანეთის პირისპირ „ოიონა“ და „კოლომიე“ დადგნენ. პირველში მარჯვენა სასტარტო ბურჯი ვეტერანი ბორჯღალოსანი ირაკლი მირცხულავა იყო, მეორეში – საქართველოს ნაკრების კიდევ ერთი ყოფილი წევრი ბექა შეყლაშვილი. პირველი ტაიმი „კოლომიემ“ 19:12 მოიგო, მაგრამ საბოლოოდ „ოიონამ“ 28:22 იმარჯვა და ნახევარფინალში გავიდა, სადაც კიდევ ერთი და მოქმედ ვეტერან ბორჯღალოსანთა შორის ყველაზე სახელოვანის, დუდუ ქუბრიაშვილის „პერპინიანს“ სტუმრად დაუპირისპირდება.
აღსანიშნავია, რომ საანგარიშო მატჩის მე-13 წუთზე შეყლაშვილმა ლელო გაიტანა, რომელიც, როგორც ბოლოს გამოჩნდა, მხოლოდ პრესტიჟისა იყო. ბექამ პირველიდან 66-ე წუთამდე ითამაშა, ხოლო მირცხულავა შესვენებისას შეცვალეს.
მეორე მატჩში „ბიარიცმა“ „გრენობლს“ 6 ლელოთი გაუმასპინძლდა, რასაც ალპელებმა ორით უპასუხეს. ამ ორიდან ერთ-ერთი, ანუ კვლავაც პრესტიჟის, ნიკა ნეფარიძემ დადო, ვისაც რაგბის მოყვალურები საქართველოსთვის სადებიუტო 20-წლამდელთა მსოფლიო ჩემპიონატიდან იცნობენ. ნიკამ თავი 62-ე წუთზე გამოიჩინა – შეცვლაზე შესვლიდან ზუსტად 4 წუთში. თუმცა, 25 წლის ქართველი ბურჯის ლელომ მის აწ უკვე ყოფილ კლუბს (ნეფარიძეს „გრენობლთან“ კონტრაქტი ამ მატჩით ამოეწურა) ვერ უშველა – „ბიარიცმა“ 41:14 მოიგო და პლეი-ოფის მომდევნო ეტაპზე უქართველებო „ვანს“ დაუპირისპირდება.
„გრენობლში“ კიდევ ერთი ქართველი იყო – სასტარტო მარჯვენა ბურჯმა ილია კაიკაციშვილმა მოედანზე 66 წუთი გაატარა. „ბიარიცის“ მარქაფაში კი ერთბაშად სამი ქართველი იყო. ბურჯები უშანგი ჭეიშვილი და ვახტანგ ახობაძე თამაშში შესაბამისად 53-ე და 57-ე წუთებზე ჩაერთვნენ, ხოლო ბორჯღალოსანმა თორნიკე ჯალაღონიამ მეორე ტაიმი ფლანკერის პოზიციაზე შეუცვლელად ჩაატარა.
მომდევნო უქმეებზე პრო დ2-ში ნახევარფინალებია: „პერპინიანი“ – „ოიონა“ და „ვანი“ – „ბიარიცი“.
