9 მაისს ქართულ ფეხბურთს კიდევ ერთი დიდებული კაცი გამოაკლდა – თბილისის „დინამოს“ ოდინდელი ექიმი ფიზიო-თერაპევტი ანზორ გაბიტაშვილი, „სიმონიჩი“, როგორც ახლობელ-მეგობრები მიმართავდნენ.
82 წლისა საკუთარ სახლში გარდაიცვალა. გაბიტაშვილი ლეგენდარული ადამიანი გახლდათ. დიუსელდორფის ფინალის დამთავრებისთანავე სწორედ მან გააგდებინა მსაჯს ხელიდან ბურთი და უკანმოუხედავად მოჰკურცხლა. „ბურთი მოვიტაცეო,“ – თავად ასე ამბობდა, კახურად.
ათასჯერ ნანახი კადრები უკვე კლასიკადაა ქცეული. ის ბურთი კი ახლაც დევს მის სახლში.
თბილისში, ვერაზე დაიბადა 1939 წლის 11 ოქტომბერს. თუმცა, კახეთში, გურჯაანის რაიონის სოფელ ვეჯინში გაიზარდა. 1966 წელს საქართველოს ფიზკულტურის ინსტიტუტის სამკურნალო ფაკულტეტი დაამთავრა. იყო თბილისის ექიმთა დახელოვნების ინსტიტუტის საექიმო კონტროლისა და სამკურნალო ფიზკულტურის მეთოდისტი. პარალელურად ლექციებსაც კითხულობდა.
1976-88 წლებში „დინამოს“ ექიმი-ფიზიოთერაპევტი გახლდათ. თავად იხსენებდა: სლავა მეტრეველი მკურნალობდა ჩვენთან და მან შემომთავაზა „დინამოში“ წასვლა, ნოდარ ახალკაცსაც ვიცნობდი და სიამოვნებით დავთანხმდიო.
დიდი „დინამოს“ ეპოქაში მოუწია მოღვაწეობა. საჭირო ადამიანი იყო. თანაც, რაც მთავარია, უშუალო, პატიოსანი კაცი, კახურად მოუქცევდა ხოლმე ხშირად და ყველას ძალიან უყვარდა.
პირველთანრიგოსანი გახლდათ ტანვარჯიშში, კარგად ჭიდაობდა. ჯარში ყოფნისას 35-ჯერ გადმომხტარა პარაშუტით თვითმფრინავიდან…
1990 წლიდან უკვე საქართველოს ეროვნული ნაკრების ფიზიოთერაპევტი გახლდათ. 2005 წელს საქართველოში სპორტული მედიცინის განვითარებაში შეტანილი განსაკუთრებული წვლილისათვის დააჯილდოვეს.
13 მაისს დიუსელდორფის ტრიუმფიდან 40 წელიწადი სრულდება. სულ რამდენიმე დღე დააკლდა ამ დიდებული თარიღს რომ მოსწრებოდა…
სარბიელელები ვუსამძიმრებთ გარდაცვლილის ოჯახს
ფოტო აღებულია თბილისის „დინამოს” ფეისბუქ-გვერდიდან
