„ტენერიფე“ და მისი ქართველი კალათბურთელი გიორგი შერმადინი საკალათბურთო ჩემპიონთა ლიგის „რვათა ფინალის“ სათამაშოდ რუსეთში გაემართნენ, მაგრამ გუნდი ნიჟნი ნოვგოროდში ქართველის გარეშე დარჩა. რუსებმა ჩვენებური ქვეყანაში არ შეუშვეს. მიზეზი, ჯერჯერობით, უცნობია. შერმადინმა ღამე ნიჟნი ნოვგოროდის აეროპორტში გაათენა.
„ტენერიფეს“ ბრაზილიელმა მოთამაშემ მარსელინიო უერტასმა სოციალური ქსელის მეშვეობით იმ სავარძლის ფოტო გაავრცელა, რომელზეც შერმადინს ეძინა და კომენტარიც დაურთო.
„დაუჯერებელია, რომ უარი თქვეს ჩვენი საუკეთესო კალათბურთელის ქვეყანაში შეშვებაზე. დრო გადის, პრობლემა არ გვარდება. ამ მნიშვნელოვანი მატჩის წინ, გიორგი აეროპორტის სავარძელზე ეძინა. ჩვენ შენთან ვართ გიო“, – წერს უერტასი.
„ტენერიფე“ და კალათბურთის საერთაშორისო ფედერაცია ამ მომენტისთვის პრობლემის გადაჭრაზე მუშაობენ.
