„ბარსელონას” შეეძლო ლა ლიგის ლიდერი გამხდარიყო, მაგრამ შინ „გრანადასთან” დამარცხდა (1:2) და ახლა „რეალის” მსგავსად „ატლეტიკოს” ორი ქულით ჩამორჩება. ჩატარებული თამაშების რაოდენობა უკვე სამივე გუნდს თანაბარი აქვს. 8 მაისს „ბარსა” და „ატლეტიკო” „კამპ ნოუზე” ხვდებიან ერთმანეთს.
აქამდე ჩემპიონობის ბედი „ბლაუგრანას” ხელში იყო, ახლა კი ვითარება შეიცვალა: კატალონიის დედაქალაქის გუნდმა „ატლეტიკო” რომც დაამარცხოს, თუკი „რეალი” თავის დარჩენილ ხუთ შეხვედრას მოიგებს, ჩემპიონი გახდება.
და კიდევ, ამბიციურ სამეულს „სევილია” წამოეწია — 33 ტურის შემდეგ „რეალზე” და „ბარსელონაზე” მხოლოდ ქულით აქვს ნაკლები.
არადა, „გრანადასთან” შეხვედრა „ბარსასთვის” კარგად დაიწყო. 23-ე წუთზე ანტუან გრიზმანმა მეტოქის საჯარიმოში წაუცეკვა, ბურთი სახეირო პოზიციაში მყოფ ლეო მესის მიაწოდა და არგენტინელმა ანგარიში გახსნა. მაგრამ, მასპინძლებმა უპირატესობა ვეღარ გაზარდეს — მეორე ტაიმში „გრანადამ” ორი საგოლე მომენტი შექმნა და ორი გოლი გაიტანა.
ანგარიში ვენესუელელმა დარვინ მაჩისმა ოსკარ მინგუესას შეცდომის წყალობით გაათანაბრა, შემდეგ კი ხორხე მოლინამ თავით, ეფექტურად, გამარჯვების გოლი შეაგდო. ამ ეპიზოდში ბარსელონელთაგან სერხი რობერტომ, ჟერარდ პიკემ და სამუელ უმტიტიმ ვერ ივარგეს.
მატჩის შემდეგ ჟორდი ალბამ იხტიბარი არ გაიტეხა: „ჩემპიონატის დასრულებამდე ჯერ კიდევ ხუთი თამაშია. ჩვენ საკუთარ შეცდომებზე ვისწავლით და შევეცდებით ხუთივე მოვიგოთ.
მეტოქეს ორი მომენტი ჰქონდა და ორივე გაიტანა. არადა, არის შეხვედრები, რომლებსაც ბეჭედი ადრევე უნდა დაუსვა. „გრანადასთან” მარცხი ჩვენთვის დიდი დარტყმა იყო.
მოკლედ, ახლა, ხუთივე უნდა მოვიგოთ. კარგი სეზონი გვაქვს, მაგრამ დღეს, სამწუხაროდ, მეორე გოლი დაგვაკლდა. გავწბილდით, მაგრამ თავი ხელში უნდა ავიყვანოთ და სეზონი წარმატებით ჩავამთავროთ”.
„ბარსელონასა” და „გრანადას” შეხვედრაში იყო კიდევ ერთი საყურადღებო მომენტი: მსაჯმა მასპინძელთა მწვრთნელ რონალდ კუმანს წითელი ბარათი ამოუღო. შედეგად, თუ კლუბმა გამართული აპელაცია არ შეიტანა, ჰოლანდიელი „ვალენსიასა” და „ატლეტიკოსთან” შეხვედრას ტრიბუნებიდან ნახავს.
საინტერესოა, რატომ გააძევა მწვრთნელი პაბლო გონსალეს ფუერტესმა. როგორც ამბობენ, მას კუმანი მეოთხე მსაჯთან გაუთავებელი ლაპარაკისთვის თავიდან სიტყვიერად გაუფრთხილებია, მაგრამ „ბარსელონას” მწვრთნელი მაინც არ გაჩერებულა და, როგორც კატალონიური პრესა წერს, უთქვამს ასეთი სიტყვები: ეს რანაირი ხასიათი აქვს!
ვისზე თქვა კუმანმა ეს და მართლა ეს თქვა თუ სხვა რამის გამო გააძევეს, ჯერჯერობით მაინც დასაზუსტებელია, მაგრამ თავად ჰოლანდიელმა მატჩისშემდგომ პრესკონფერენციაზე ასე განმარტა:
„ოქმში წერია, რომ მე მეოთხე მსაჯს შეურაცხყოფა მივაყენე. ვერაფერი გამიგია, რადგან მისთვის ცუდი ნამდვილად არაფერი მითქვამს. მეტიც, თუ ძალიან ჩავეძიებით ის მომეპყრო უპატივცემულოდ.
მე მას სხვადასხვა მომენტებზე მართლა ველაპარაკებოდი, მაგრამ უპატივცემულობა არ გამომიხატავს. მაინტერესებს, კერძოდ რა სიტყვებზე მედავებიან. ცუდი არაფერი მითქვამს. ეტყობა, მეოთხე მსაჯს ყურადღების ცენტრში მოქცევა მოუნდა”.
