„მარკა” წერს, რომ ლეო მესის მომავალი მკაფიო კონტურებს იძენს — არგენტინელი, სავარაუდოდ, „ბარსელონაში” დარჩება. მის წარმომადგენლებსა და კლუბს შორის მოლაპარაკებები დაიწყო. მართალია, ისინი ჯერ არაფორმალურია, მაგრამ საქმე ნულიდან აშკარად დაიძრა.
TV3-ის ინფორმაციით, 32 წლის ვარსკვლავის მამა და აგენტი ხორხე მესი კვლავ შეხვდა „ბარსას” პრეზიდენტ ჟოან ლაპორტას. ტელეკომპანია ამბობს, რომ ორივე მხარე დაინტერესებულია გამონახოს საერთო ენა და საბოლოო შეთანხმებამდე მივიდეს.
მეორე მხრივ, ცნობილი გახდა, რომ ლაპორტას მესის წარმომადგენლებისთვის კონკრეტული პირობები ჯერ არ შეუთავაზებია. მიზეზი გასაგებია: „ბარსელონას” პრეზიდენტს სურს ჯერ კლუბის ფინანსურ მდგომარეობაში გაერკვეს და იმის მიხედვით იანგარიშოს, რისი გადამხდელია და რისი არა.
თუმცა, იკვეთება მოლაპარაკების კიდევ ერთი ასპექტი: თურმე, მესის სპორტული მხარე უფრო აინტერესებს, ვიდრე ფინანსური. ისიც კი ითქვა, რომ არგენტინელი მზად არის გასამრჯელო 50 პროცენტით მოიკლოს, რათა კლუბმა დაზოგილი ფულით ახალი მოთამაშე იყიდოს.
მესის სურს „ბარსელონაში” დარჩეს და 2022 წლის მსოფლიოს ჩემპიონატამდე უმაღლეს დონეზე ითამაშოს. ამის შემდეგ, ის, სავარაუდოდ MLS-ში გადავა. ამერიკელთაგან მის შესაძენად ყველაზე მეტად დევიდ ბექემის „ინტერ მაიამი” აქტიურობს.
ფლორიდაში გადაბარგებამ შესაძლოა კვლავ ერთად შეყაროს მესი და ლუის სუარესი. ამასთან, მესი აშშ-ში „ბარსას” ელჩის სტატუსსაც მიიღებს.
