„რეალს” დაღლილობა ეტყობოდა. ზინედინ ზიდანის უილაჯო გუნდმა „ბეტისთან” 0:0 ითამაშა და ჩემპიონობისთვის ბრძოლაში მნიშვნელოვანი ორი ქულა დაკარგა. მისი კონკურენტები, „ატლეტიკო” და „ბარსელონა” დღეს ხვდებიან „ბილბაოსა” და „ვილიარეალს”. ორივე სტუმრად თამაშობს. აქვე დავძინოთ, რომ 8 მაისს, „ატლეტიკო” „ბარსელონას” სტუმრობს.
ამწუთას, „რეალი” მეორეზეა, „ატლეტიკოზე” ორი ქულით ნაკლები და ერთი თამაშით მეტი აქვს. ის სამი ქულით უსწრებს მესამე ადგილზე მყოფ „ბარსას”, მაგრამ კატალონიელებს ორი თამაშით ნაკლები აქვთ.
„თეთრებმა” „ბეტისის” კართან ცოტა მომენტები შექმნეს. ყველაზე მწვავე ის ეპიზოდი იყო, როდესაც როდრიგომ ბურთი სტუმართა კარის ძელს გაარტყა.
მოედნის მეორე ბოლოში, ერთ მომენტში ტიბო კურტუამ აუღო ბორხა იგლესიასს ძნელად მოსაგერიებელი დარტყმა, მეორეში კი დიეგო ლაინესმა კარგი შეტევა ცუდად დააბოლოვა.
„რეალისთვის” სასიამოვნო ამბავი ის იყო, რომ ბოლო 16 წუთით მოედანს გამოჯანმრთელებული ედენ აზარი დაუბრუნდა და ურიგოდ არ უთამაშია, მაგრამ ეს გამარჯვებისთვის საკმარისი არ აღმოჩნდა.
სტატისტიკოსებმა საინტერესო ფაქტი მოიძიეს: „ბეტისი” მადრიდში, „რეალთან”, უკვე ზედიზედ მეოთხე შეხვედრაში არ უშვებს გოლს.
თავში მადრიდელთა დაღლილობა ვახსენეთ. თუ გავითვალისწინებთ, რომ გუნდს ჩემპიონთა ლიგასა და ლა ლიგაში მიჯრით რთული მატჩები გადახდა და არც ტრავმებმა დაინდო, ამაში გასაკვირი არაფერია. სამაგიეროდ, ზიდანის გუნდის დაქანცულობა ფრიად ახარებთ „ატლეტიკოს”, „ბარსელონასა” და „ჩელსის”, რომელიც ჩემპიონთა ლიგის ნახევარფინალში სამშაბათს სტუმრობს „ლოს ბლანკოსს”.
