„მარკა” წერს, რომ ევროპის სუპერლიგა დაფუძნდა. ამის შესახებ კვირას, გვიან საღამოს გახდა ცნობილი. ლიგის დამფუძნებლები არიან „რეალი”, „ბარსელონა”, „ატლეტიკო”, „მილანი”, „ინტერი”, „იუვენტუსი”, „არსენალი”, „ჩელსი”, „ლივერპული”, „მანჩესტერ სიტი”, „მანჩესტერ იუნაიტედი” და „ტოტენჰემი”.
სუპერლიგის პირველი თავმჯდომარე იქნება ფლორენტინო პერესი.
სუპერლიგამ გაავრცელა განცხადება, სადაც წერია, რომ მას ფიფასა და უეფასთან თანამშრომლობის იმედი აქვს. გარდა ამისა, განცხადებაში განმარტებულია, თუ რის მიხედვით შეარჩიეს ლიგის ოფიციალურად დაფუძნების მომენტი — კოვიდპანდემიას ცხადად გამოუჩენია, რომ ევროპული ფეხბურთის არსებული ფორმატი არ ვარგა.
მთელს საფეხბურთო პირამიდას, სტრატეგიული ხედვა და სტაბილური კომერციული მიდგომა სჭირდებაო, — წერია განცხადებაში. იქვე აღნიშნულია, რომ ბოლო თვეებში ევროპული ფეხბურთის მმართველებთან მიმდინარეობდა ინტენსიური მოლაპარაკებები, მათ შორის დღეს არსებული ფორმატის მოდერნიზაციის თაობაზე, მაგრამ ამ მოლაპარაკებების მსვლელობისას სუპერლიგის დამფუძნებლები დარწმუნებულან, რომ შემოთავაზებული რეფორმები ფუნდამენტურ საკითხებს ვერ გადაწყვეტს — ვერც თამაშის ხარიხს აამაღლებს და ვერც კომერციულ მხარეს მოაწესრიგებს.
„ჩვენ ფეხბურთს ყველა დონეზე მივხედავთ და ყველა დონეს შესაფერის ადგილს მივუჩენთ. ფეხბურთი დედამიწაზე სპორტის ერთადერთი სახეობაა, რომელსაც 4 მილიარდ გულშემატკივარზე მეტი ჰყავს და ჩვენ, დიდი კლუბები, მოვალენი ვართ, მათ მოთხოვნებს ვუპასუხოთ,” — თქვა ფლორენტინო პერესმა.
როგორც ხედავთ, „ბაიერნი” და „პარი სენ ჟერმენი” ჯერ სიფრთხილეს იჩენენ და დამფუძნებლებს არ უერთდებიან.
როგორც ამბობენ, სუპერლიგის კლუბები ცდილობენ დანარჩენებს აუხსნან, რომ ისინი ეროვნულ ჩემპიონატებს კი არ ებრძვიან, არამედ ჩემპიონთა ლიგის ჩანაცვლებას აპირებენ, მაგრამ „დანარჩენებისთვის” ცხადია, რომ ახალი წამოწყება მდიდრებსა და ღარიბებს შორის ზღვარს კიდევ უფრო გაზრდის და, ადრე თუ გვიან, ეროვნულ ჩემპიონატებში მათი ერთად მონაწილეობა უაზრობა გახდება.
სავარაუდოდ, დღეს, თავის ახალ პროექტს დაამტკიცებს უეფაც.
