„ბაიერნი” სეზონის უმნიშვნელოვანეს მონაკვეთში მთავარი ვარსკვლავის, 32 წლის რობერტ ლევანდოვსკის გარეშე დარჩა. „რეკორდმაისტერმა” ოფიციალურად დაადასტურა, რომ პოლონელი თავდამსხმელი ოთხ კვირას გამოტოვებს.
მიზეზი: ლევანდოვსკიმ ანდორასთან მსოფლიოს ჩემპიონატის შესარჩევ შეხვედრაში (3:0), მარჯვენა მუხლთან მყესი გაიჭიმა. 2020 წლის მსოფლიოს საუკეთესო ფეხბურთელმა ანდორელებს პირველი ორი გოლი გაუტანა, მე-60 წუთზე კი ტრავმის გამო მოედანი დატოვა.
პოლონელი ექიმების თავდაპირველი ვარაუდით, ლევანდოვსკის ხუთიდან ათ დღემდე მოუწევდა გაცდენა, მაგრამ შემდგომმა გამოკვლევებმა ცხადყო, რომ დაზიანება უფრო სერიოზულია და მკურნალობასაც მეტი დრო დასჭირდება.
ლევანდოვსკი, რომელსაც მიმდინარე სეზონში 35 გოლი აქვს გატანილი, სამშაბათს მიუნხენში დაბრუნდა და შემდგომ კვლევებს ბავარიელთა ბაზაზე, ზაბენერ შტრასეზე გაივლის. „ბილდის” წინამდებარე ფოტოც უკვე მიუნხენში, შინისკენ მიმავალ გზაზეა გადაღებული.
რაც შეეხება „ბაიერნის” უახლოეს კალენდარს: შაბათს, 3 აპრილს, „რეკორდმაისტერი” მეორე ადგილზე მყოფ „ლაიფციგს” ხვდება; შემდგომ ოთშაბათს, 7 აპრილს კი ჩემპიონთა ლიგის მეოთხედფინალში „პარი სენ ჟერმენს” უმასპინძლებს. საპასუხო თამაში, პარიზში, 13 აპრილსაა.
ლევანდოვსკის გარეშე ჩაივლის აგრეთვე მატჩები „უნიონ ბერლინთან”, „ვოლფსბურგთან” და „ლევერკუზენთან”.
