28 მარტს საქართველოს საფეხბურთო ნაკრები 2022 წლის მსოფლიო ჩემპიონატის შესარჩევი ეტაპის მეორე ტურში შინ ესპანეთს დაუხვდება.
მომავალი დაპირისპირებისთვის ორივე გუნდი ემზადება და მატჩისწინა ვარჯიშთან ერთად პრესკონფერენციაც გამართეს.
როგორც ყოველთვის მწვრთნელებმა სტანდარტულად ისაუბრეს, მაგრამ ვილი სანიოლი ერთ ყურადსაღებ წინადადებას ამბობს, შვედეთთან წაგებული მატჩში დღესაც არაფერს შევცვლიდიო.
„ფეხბურთელებთან ბევრს ვმუშაობთ და ვცდილობთ ეს ყველაფერი მოედანზე გადავიტანოთ. შვედეთის მატჩის შემდეგ ვთქვი რომ ამაყი ვარ და ახლა იგივეს გავიმეორებ – ფეხბურთელებმა კარგად ითამაშეს და მათთან სასაყვედურო არ მაქვს. შვედეთთან თამაშში დღესაც არაფერს შევცვლიდი. ბიჭებმა ყველაფერი გააკეთეს მოსაგებად, ან ქულის ასაღებად, მაგრამ, საბოლოოდ ისე მოხდა, რომ შვედეთმა მოიგო…
რაც შეეხება ესპანეთთან თამაშს, ყველა გუნდს თავის ტაქტიკას მოვარგებთ და ისე ვითამაშებთ. სტატისტიკა ბევრს არაფერს ნიშნავს და ეს ესპანეთი-საბერძნეთის (1:1) მატჩის დროსაც გამოჩნდა. ფავორიტი ყოველთვის ვერ იგებს. ესპანეთთან თამაში ყველა შემთხვევაში რთული იქნება. ხვალ შანსი ყველას მიეცემა, ვინც სასურველ ფორმაში იქნება“, – განაცხადა სანიოლიმ.
„საქართველოს ნაკრებზე დიდი ინფორმაცია არ მაქვს, მხოლოდ ერთი, ბოლო თამაში ვნახეთ. შვედეთთან დაცვაში კარგად ითამაშა და, ვფიქრობ, ქულას იმსახურებდა. შევეცდებით, მათთან იმაზე კარგად ვითამაშოთ, ვიდრე ეს საბერძნეთთან გავაკეთეთ.
თავად საქართველოსგან დაახლოებით ისეთივე თამაშს ველით, როგორიც შვედეთთან იყო. არ მგონია, რომ იოლი თამაში გვექნეს…
მატჩს 15 ათასი გულშემატკივარი დაესწრება, რაც ძალიან სასიამოვნოა. ამ სტადიონთან მეც კარგი მოგონებები მაქვს, რადგან აქ სუპერთასი მოვიგეთ“, – ეს ესპანელთა მწვრთნელის, ლუის ენრიკეს სიტყვებია.
