„ბარსელონასა” და ბრაზილური ფეხბურთის ლეგენდა რივალდო ამბობს, რომ ამიერიდან ლეო მესი უმალ დარჩება „კამპ ნოუზე”, ვიდრე წავა. გასულ ზაფხულს, მსოფლიოს ექვსგზის საუკეთესო მოთამაშე კატალონიური კლუბის მაშინდელ ხელმძღვანელებთან ახალი კონტრაქტის პირობებზე ვერ შეთანხმდა და „ბლაუგრანადან” წასვლას აპირებდა.
არგენტინელისა და „ბარსელონას” დავის შესახებ იმდენი დაიწერა, რომ ახლა ყველაფრის გამეორება შორს წაგვიყვანდა, მაგრამ ფაქტია, რომ საკითხი ჯერ კიდევ არ არის გადაწყვეტილი. მესის შეძენა სურთ „მანჩესტერ სიტის”, „პარი სენ ჟერმენსა” და რამდენიმე ამერიკულ კლუბს.
48 წლის რივალდო, რომელიც „ბარსაში” 1997-2002 წლებში გამოდიოდა, ამბობს, რომ მას მერე, რაც „ბარსელონას” პრეზიდენტად ჟოან ლაპორტა აირჩიეს და ის მესის ელაპარაკა, სიტუაცია ფეხბურთელის „კამპ ნოუზე” დარჩენის სასარგებლოდ შეიცვალა.
Betfair-თვის მიცემულ ინტერვიუში 2002 წლის მსოფლიოს ჩემპიონმა თქვა: „ლაპორტას არჩევის შემდეგ, მესის შესანიშნავი ფორმის წყალობით, „ბარსელონა” გაცილებით უკეთ თამაშობს. ლეო ლაპორტას მოსვლის მერე აშკარად ბედნიერი და მოწადინებულია. ის და პრეზიდენტი კარგად იცნობენ ერთმანეთს. ამიტომაც, სულ მეტად და მეტად ვიხრები იმ აზრისკენ, რომ მესი კლუბის ახალ ხელმძღვანელობასთან საერთო ენას გამონახავს და „კამპ ნოუზე” დარჩება”.
