შვედეთი-საქართველოს ნაკრების მატჩის წინ მასპინძელთა მწვრთნელმა იან ანდერსონმა და ახალმა კაპიტანმა სებასტიან ლარსონმა ჟურნალისტებთან ისაუბრეს.
შეგახსენებთ, ეს 2022 წლის მსოფლიოს ჩემპიონატის შესარჩევი ეტაპის პირველი ტურის მატჩია.
„იწყება ახალი ეტაპი. ორი ნაყოფიერი ვარჯიში გვქონდა. კორონავირუსზე ტესტები ჩავიტარეთ და პასუხები უარყოფითია. თამაშებს შორის მხოლოდ ორდღიანი შუალედი გვაქვს. ამიტომ, როტაციას მივმართავთ. საქართველოსთან წინასწარ მაქვს გადაწყვეტილი, ვინ იქნება ძირითად შემადგენლობაში. ვერ დაგვეხმარებიან მარკუს ბერგი, იოაკიმ ნილსონი და ანდრეას გრანკვისტი,“ – თქვა ანდერსონმა.
სწორედ გრანკვისტის არყოფნაა მიზეზი, რომ სკანდინავიელებს 35 წლის სებასტიან ლარსონი უკაპიტნებს.
„საქართველოს კარგი ტექნიკური და ინდივიდუალისტი ფეხბურთელი ჰყავს. ისინი შეტევაში კარგად თამაშობენ, მაგრამ ამ სტილით წარმატებისთვის არ მიუღწევიათ და ერთა ლიგიდან ევროპის ჩემპიონატზე ვერ გავიდნენ. დაბალი დონის გუნდია, მაგრამ დაუფასებლობა არ შეიძლება“, – ეს უკვე ლარსონმა თქვა.
