ბრიტანეთის პრემიერ მინისტრი ბორის ჯონსონი უეფას ევროპის მოახლოებული ჩემპიონატისთვის თავისი ქვეყნის სტადიონებს სთავაზობს. აქ, ლაპარაკია მთელს შეჯიბრებაზე და არა იმ რამდენიმე შეხვედრაზე, რომლებიც ბრიტანეთში ისედაც უნდა გაიმართოს.
განვმარტავთ: მსოფლიოში კორონაპანდემია მძვინვარებს, გაერთიანებულ სამეფოს კი „ბებერ კონტინენტზე” ვაქცინაციაში ბადალი არ ჰყავს. შესაბამისად, თუ ევრო 2020-ის (აწ უკვე ევრო 2021-ის) მასპინძლებად ჩანიშნული ქვეყნებიდან ბევრი ვერ შეძლებს სტუმრების მიღებას და მატჩების ჩატარებას, ბრიტანეთი მზად არის მთელს ჩემპიონატს უმასპინძლოს.
და თუ პრემიერის გეგმა მართლა ხორცს შეისხამს, არ არის გამორიცხული დასაბამი დაედოს ფეხბურთში ბრიტანეთის „ოქროს ათწლეულს”, რომელიც კანცლერ რიში სუნაკის მოწადინებითა და ხაზინიდან გაღებული მილიონებით, 2030 წელს ირლანდიასთან ერთად მსოფლიოს ჩემპიონატის მასპინძლობით დასრულდება.
ბორის ჯონსონმა „სანისთვის” მიცემულ ექსკლუზიურ ინტერვიუში თქვა: „ჩვენ ძალიან დიდი სურვილი გვაქვს, 2030 წელს ფეხბურთი სამშობლოში რომ დავაბრუნოთ. ვფიქრობ, საამისოდ ბრიტანეთი ზედგამოჭრილი ადგილია. ის ფეხბურთის სამშობლოა, დროც საუცხოოდ იქნება შერჩეული და ტურნირის მასპინძლობა ქვეყნისთვისაც ჩინებული იქნება”.
პრემიერს მიაჩნია, რომ თუკი გაერთიანებული სამეფო, რომელმაც გაბედული ნაბიჯი გადადგა — ევროკავშირი დატოვა და იმავდროულად ვაქცინაციის საკითხშიც ყველაზე წინ არის, ამ ზაფხულს ევროპის ჩემპიონატს მთლიანად უმასპინძლებს, ეს 2030 წლისთვის სერიოზული განაცხადი იქნება.
ბორის ჯონსონი ამბობს, რომ ერთი სული აქვს როდის გაიხსნება ლუდხანები და თავის უბანში ევრო 2021-ის მასპინძლობის სადღეგრძელოს დალევს. ლუდხანები და პაბები კი ბრიტანეთში აპრილიდან იხსნება. ხოლო სადაც ლუდი, იქაც ფეხბურთი.
შეგახსენებთ, რომ ჯერჯერობით არსებული გეგმის თანახმად, ინგლისში D ჯგუფის სამი შეხვედრის გარდა, ერთი მერვედფინალი, ნახევარფინალები და ფინალიც გაიმართება. და თუ ივლისისთვის კოვიდრეგულაციები შემსუბუქდება, ვაქცინაცია წარმატებით ჩატარდება და აცრილთა პასპორტიზაციასაც შემოიღებენ, „უემბლიზე” ევროპის ჩემპიონატის ფინალს შეიძლება 90 000 გულშემატკივარიც კი დაესწროს.
