თბილისმა წინა კვირაში ევროპის საკალათბურთო ჩემპიონატის საკვალიფიკაციო მატჩებს უმასპინძლა. სამწუხაროდ, მანამდე ქვეჯგუფის ლიდერმა საქართველოს ნაკრებმა ორივე შეხვედრა დათმო. ამ შეხვედრებში გუნდს ვერ დაეხმარა კაპიტანი თორნიკე შენგელია. მიზეზი საპატიო იყო – ტრავმა.
გულში ხინჯი მაშინ გაჩნდა, როცა სანაკრებო მატჩებიდან სამიოდ დღეში ჩვენი კაპიტანი რუსულ ცსკა-სთან ერთად საბერძნეთში გაემგზავრა და ევროლიგის მორიგ შეხვედრაში “ოლიმპიაკოსთან” სრულფასოვნად ითამაშა. 22 წუთი, 8 ქულა, 4 მოხსნა, 3 ჩაჭრა – ასეთია ქართველის მონაგარი.
იმის გათვალისწინებით, რომ ბერძნული გუნდი ხისტი, ჯარიმის ზღვარზე თამაშის მიმდევარია, ჩვენი კაპიტნის შედეგიც ჩინებულია და ციფრებს მიღმა ვერც ტრავმის კვალი იკითხება.
სამ დღეში სასწაულებრივი გამოჯანმრთელება? დიდებულია, მაგრამ ჩვენს ნაკრებებში ერთი უცნაურობა შეინიშნება: ლეგიონერი სანაკრებო მატჩების წინ მოულოდნელად ტრავმას იღებს და როგორც კი სანაკრებო ბატალიები ჩაივლის, უმალვე იკურნება.
აკი, ეს მხოლოდ სპორტია და რუსული არმია არაფერ შუაშიაო? აკი, გუნდში შემპირდნენ, სანაკრებო კარიერას იოტისოდენადაც არ შეგიზღუდავთო? თორნიკეს კი არ ვერჩოდით – რუსების სულის სარჩული ვიცოდით კარგად და კონტრაქტის გაფორმებამდე იმადაც ვაფრთხილებდით.
საქართველოს ნაკრების კაპიტნობა ძალიან დიდი ტვირთია. ან მზად ხარ რომ ზიდო, ან უბრალოდ გქვია. სულ ცოტა ხნის წინ გვყავდა კაპიტანი, ტრავმიანიც რომ ჩამოსულა და სიმბოლურად სათადარიგოთა სკამზე ჯდომით “დაუქოქავს” ბიჭები. რა გითხრათ? დანარჩენი თითოეულის არჩევანის ამბავია…
