როგორ გინდა ამის ტექსტურად გადმოცემა? ეს უნდა ნახო. ერთი წუთით წარმოიდგინეთ, რას შეიძლება გრძნობდეს ჩოგბურთელი, რომელიც გადამწყვეტ სეტში 3:5 ჩამორჩება და საკუთარ მოწოდებას 15:40 აგებს. ვერ გამოიცნობთ, რადგან ის ყველა არ არის. ნაომი ოსაკა არსაიდან პოულობს ძალებს და უკვე წაგებულს მოგებად აქცევს.
ავსტრალიის ღია პირველობის მერვედფინალში 23 წლის იაპონელი მასზე გამოცდილ ესპანელ გარბინიე მუგურუზას დაუპირისპირდა. ორი ექს-პირველი ჩოგნის პაექრობა თითქოს ესპანელის მოგებით სრულდებოდა, მაგრამ ოსაკამ ჯერ ზედიზედ ოთხი გათამაშება (ორი ეისით) მოიგო, მერე კიდევ სამი გეიმი (ორი მეტოქის მოწოდებაზე) და მეოთხედფინალში გავიდა. ნაომისგან აღარ გვიკვირს.
გავიხსენოთ ისიც, რომ US OPEN-ის შარშანდელი ფინალი ვიქტორია აზარენკასთან 1:6, 0:2 – დან შემოატრიალა.
ისე, საინტერესოა, რომ კარიერის განმავლობაში ოსაკა სულ სამჯერ გავიდა სლემტურნირის მეოთხედფინალში და საბოლოოდ სამივეჯერ იჩემპიონა. ეს მეოთხე მეოთხედფინალია. მეტოქეში გაუმართლა ნაომის. ჩინელი სე შუვეი რეალისტი გოგონაა, რომელმაც ტურნირზე მასზე გაცილებით რეიტინგული სამი მეტოქე დაამარცხა და ილუზიები აღარ აწუხებს.
„ვიცი, რომ ნაომი უბრალოდ გამიტანს კორტიდან, მაგრამ ვეცდები, ბოლომდე ვიბრძოლო,“ – თქვა ჩინელმა.
იქნება მეოთხე სლემტიტული? რატომაც არა – შარშან მარტის შემდეგ ნაომი ოსაკას ზედიზედ 18 მატჩი აქვს მოგებული და შეჩერებას არ გეგმავს.
