„რეალმა” „ხეტაფეს” 2:0 მოუგო.
ამ შეხვედრაში ზინედინ ზიდანმა ტაქტიკური ცვლილებებით მიიპყრო ყურადღება.
მადრიდელთა მწვრთნელმა, როგორც ჩანს, სერხიო რამოსის გარეშე დარჩენილი დაცვის გაძლიერება გადაწყვიტა და მეტოქე გუნდის შეტევებს ფაქტობრივად ხუთი უკანახაზელით ხვდებოდა — ფერლანდ მენდიმ მარცხენა ცენტრალური მცველის როლი მოირგო.
ფრანგის ტაქტიკამ გაამართლა. „ხეტაფემ” კარში მხოლოდ ერთხელ დაარტყა, ხოლო მენდიმ დაცვას ხომ არგო და შეტევაშიც გამოიჩინა თავი — „თეთრების” მეორე გოლი შეაგდო.
პირველი ქარიმ ბენზემას ანგარიშზეა.
ამრიგად, „რეალმა” „ატლეტიკოსთან” ჩამორჩენა ხუთ ქულამდე შეამცირა, მაგრამ „მატრასების მკერავებს” ორი თამაში მარაგში აქვთ.
„დღეს ჩვენ ძალიან ცუდად ვითამაშეთ”, — მატჩის დამთავრების შემდეგ უკმაყოფილებას გამოთქვამდა „ხეტაფესა” და სერბეთის ნაკრების ნახევარმცველი ნემანია მაქსიმოვიჩი.
ფაქტია, „რეალს” ამ შეხვედრაში გამარჯვება არ გასჭირვებია.
