აი, ამიტომ არის „მანჩესტერ სიტი” სულით ჩემპიონი! ფორმალურად, ჯერ არა, მაგრამ… გავა ცოტა ხანი და როგორც ჩანს ფორმალურადაც გახდება. დღეს ეს გუნდი საუცხოო ფორმაშია. როგორც „დეილი მეილი” ამბობს, „სიტი” ახლა ისე თამაშობს, რომ ინგლისური ფეხბურთის ისტორიაში ყველა დიდ ჩემპიონს უტოლდება. და მან გადამწყვეტ, პრინციპულ მატჩში „ლივერპულს” ისე მოუგო, რომ ყველა სეზონს შორის ყველაზე უცნაურში თავის უპირატესობას დიდი ძახილის ნიშანი დაუსვა.
ცხრილში „სიტი” მდევარ „მანჩესტერ იუნაიტედს” 5 ქულით უსწრებს, მაგრამ თამაში აქვს მარაგში და თუ ამ გამოტოვებულ მატჩში, შემდეგ კვირაში, „ევერტონს” მოუგებს, სხვაობა უკვე 8 ქულა გახდება.
„მანჩესტერ სიტიმ” ზედიზედ 14 თამაში მოიგო. ასეთი რამ 1892 წელს „პრისტონმა” გააკეთა, ხოლო 1987 წელს „არსენალმა”. თან, „ქალაქელებს” სერხიო აგუერო და კევინ დე ბრუინი აკლიათ!
პეპ გვარდიოლას გუნდის მთავარ მეტოქედ ინგლისში მაინც უფრო „ლივერპულს” მიიჩნევდნენ ვიდრე „მანჩესტერ იუნაიტედს”. ამიტომაც ელოდა ყველა გუშინდელ თამაშს მოუთმენლად. გუშინ, „ენფილდზე”, მერსისაიდელებს მეტოქე უნდა დაემარცხებინათ და პრემიერლიგაში ჩემპიონობისთვის დიდი საგაზაფხულო ბრძოლა გაჩაღდებოდა, მაგრამ „სიტიმ” ყველა შეკითხვას დამაჯერებელი პასუხი გასცა.
„ლივერპულისთვის” პირველი ტაიმი უსიამოვნო გამოდგა, მეორე კი გამანადგურებელი. სტუმარმა მასპინძელს 4:1 მოუგო. მართალია, ოთხი გოლიდან ორი „წითლების” ბრაზილიელი მეკარის ალისონის გასაოცარ შეცდომებს მოჰყვა (შეგიძლიათ ეს ორი ეპიზოდი ქვემოთ, ვიდეოზე ნახოთ), მაგრამ ვინც თამაში ნახა დაგვეთანხმება, რომ ეს არ იყო თანაბარი მატჩი, რომელიც ერთმა მეორეს მეკარის უიღბლო შეცდომების გამო მოუგო.
არ დაგვავიწყდეს, რომ „სიტიმ” პირველ ტაიმში პენალტიც ააცილა. სიზუსტე ილქაი გუნიდოგანს არ ეყო, რომელიც ამის გამო, შესვენების შემდეგ, კი არ წახდა, არამედ ორი გოლი გაიტანა.
ამ წაგების გამო „ლივერპული” „სიტის” მთელი ათი ქულით ჩამორჩება. მერსისაიდელებმა შინ ზედიზედ მესამე თამაში წააგეს, ასეთი რამ კი ბოლოს მაშინ მოხდა, როდესაც ჩართებში პირველ ადგილზე „ბიტლზის” She Loves You იყო.
იმ წელიწადს ბელფასტელმა თინეიჯერმა, ვინმე ჯორჯ ბესტმა „მანჩესტერ იუნაიტედში” თავისი პირველი თამაში ჩაატარა, ხოლო ჯონ კენედი ჯერ კიდევ ამერიკის პრეზიდენტი იყო. მაშინ, „ლივერპულმა” შინ ზედიზედ მესამედ 1963 წლის 14 სექტემბერს წააგო.
შემდეგი თარიღი, რომელიც აქ უნდა ვახსენოთ, არის 2003 წლის 3 მაისი. ეს გახლავთ დღე, როდესაც „სიტიმ” „ენფილდზე” მოიგო. მას მერე, „ქალაქელები” ლივერპულში 29-ჯერ ჩავიდნენ და გუშინდლამდე ერთხელაც არ მოუგიათ. მაშინ „სიტის” ორი გოლი ფრანგმა ნიკოლა ანელკამ გაიტანა. ერთი პენალტი იყო.
პენალტები… გასული სეზონიდან მოყოლებული „მანჩესტერ სიტიმ” რვა პენალტი ვერ გაიტანა. პრემიერლიგაში ისე ვერავინ აფუჭებს თერთმეტმეტრიან დარტყმებს, როგორც გვარდიოლას გუნდი.
და როგორ არტყამს „სიტი” პენალტებს” „ლივერპულთან”? საშინლად. გუშინდელი თამაშის წინ ბევრს წერდნენ, რომ „ქალაქელები” „ენფილდზე” ვერ იგებენ, მაგრამ ეს წარუმატებელი სვლა 2018 წელს შეიძლებოდა შეწყეტილიყო რიად მაჰრეზს თამაშის დამთავრებამდე ოთხი წუთით ადრე პენალტი რომ შეეგდო. მერსისაიდელებთან პენალტის ნიშნულიდან თვით კევინ დებრუინმაც ვერ იყოჩაღა, მას კი წუხელ, აგერ, გუინდოგანიც შეუერთდა.
მაგრამ, გერმანელმა მაინც გახსნა ანგარიში, რასაც მო სალაჰმა გოლით უპასუხა. შემდეგ კი დაიწყო „სიტის” ფოიერვერკი — ისევ გუინდოგანი, რაჰიმ სტერლინგი და ფილ ფოდენი! 4:1!
ნეტავ, ამიერიდან „მანჩესტერ სიტის” რამ შეიძლება ხელი შეუშალოს და ის ჩემპიონი ვერ გახდეს?!
