საქართველოს მორაგბეთა ნაკრებმა დაამარცხა რუსი „დათვები“ და პირველი ადგილი დაიკავა 2020 წლის ჩემპიონატში, რაც ჯერ კიდევ ერთი წლის წინ იყო გარკვეული.
რუსეთი მე-5 ადგილზე გავიდა, მეორეზე – ესპანეთი, რომელმაც დასკვნით ტურში პორტუგალიის ნაკრებს უმასპინძლა და 25:11 დაამარცხა. „ლობუში“ მე-4 საფეხურამდე ჩამოქვეითდა.
და ვინ გაუსწრო პორტუგალიელებს? გაგიკვირდებათ და, რუმინეთის ყოვლად სამარცხვინო ნაკრებმა, რომელიც ბოლო ტურამდე სატურნირო ცხრილის ფსკერზე იყო. საქმე ისაა, რომ ბოლო ტურში „სტეჟარებს“ ბელგიის ნაკრებისთვის უნდა ემასპინძლათ, რომელმაც ტურნირის მთავარი სენსაცია გამოაცხო, როცა რუსები ქედმაღლობისთვის სასტიკად დასაჯა, დაამარცხა რა 38:12.
ჰოდა, ეს საბრალო ბელგიელები რუმინეთში არ ჩავიდნენ, მთავრობის რჩევა გაითვალისწინეს და კორონავირუსით დაინფიცირების შიშით ამ კუთხით არცთუ მშვიდობიან რუმინეთში გამგზავრებაზე უარი თქვეს.
„რაგბი ევროპისა“ და მისი რუმინელი მეთაურის – ოქტავიან მორარიუს რეაქციამაც არ დააყოვნა – მოკლე განხილვის შემდეგ ბელგიის ნაკრებს ტექნიკური წაგება ჩაეთვალა – 0:28. ანუ რუმინელებს 4 გარდასახული ლელო ჩაეწერათ აქტივში, რამაც გამარჯვებისთვის კუთვნილ 4 ქულას 1 ბონუსიც წაუმატა.
ისიც საკითხავია, თუ რატომ 28:0 და არა 21:0, რადგან „რაგბი ევროპის“ ჩემპიონატში ბონუსის მისაღებად ეს ანგარიშიც სავსებით საკმარისია. მოკლედ, ამ ბედოვლათი ორგნიზაციის მოქმედებებში ლოგიკას იშვიათად რომ აღმოაჩენს კაცი, ახალი არაა.
ამის დასტურიც აქვეა: 6-7 მარტს დანიშნულია 2021 წლის ჩემპიონატის სტარტი და მეექვსე გუნდის ვინაობა ჯერაც გასარკვევია – ბელგია ადგილის შენარჩუნებას მეზობელ ნიდერლანდებთან ჯახში ეცდება, რომლის გამართვაც „რაგბი ევროპამ“ ზაფხულისთვის ჩაინიშნა. შე დალოცვილო, 2021 წლის სეზონი მსოფლიო თასის შესარჩევი ციკლის ნაწილი რომაა, ვერავინ შეგახსენა?!
ასე კი გამოდის, რომ პირველ ტურში საქართველოს ნაკრები იუქმებს, რადგან არაა ცნობილი, ვის უნდა ესტუმროს – ბელგიას თუ ნიდერლანდებს? „რაგბი ევროპის“ ჩემპიონატებში დამკვიდრებული წესის მიხედვით კალენდარს ხომ სწორედ ასე ადგენდნენ – პირველ ტურში პირველი მიდის მეექვსესთან,მეორეში მეხუთეს მასპინძლობს და ა.შ…
აქ კიდევ ერთი ნახევრად კომიკური მომენტი იკვეთება – ბორჯღალოსანთა მეორე ტურის მეტოქე წესით რუსეთი უნდა იყოს, თანაც საქართველოში. ამდენად, „დათვებმა“ იჩქარეს ჩვენი ქვეყნის დატოვება. ბარემ აქ მომზადებულიყვნენ და მარტის ბოლოს აქვე შეგვხვედროდნენ.
ეს ყველაფერი ფაქტებზე დაყრდნობილი ჰიპოთეზაა, მაგრამ „რაგბი ევროპა“ თავისი უთავბოლოობით საფრთხეს უქმნის ზაფხულის ტესტებს, რომლებსაც მეორე დონის ნაკრებები ჰაერივით ელოდებიან…
„რაგბი ევროპის“ 2020 წლის ჩემპიონატის ადაპტირებული საბოლოო ცხრილი ასე გამოიყურება:
| საქართველო | 5 | 5 | 0 | 0 | 197:60 | 24 |
| ესპანეთი | 5 | 3 | 0 | 2 | 103:93 | 13 |
| რუმინეთი | 5 | 2 | 0 | 3 | 101:102 | 10 |
| პორტუგალია | 5 | 2 | 0 | 3 | 98:111 | 9 |
| რუსეთი | 5 | 2 | 0 | 3 | 82:128 | 8 |
| ბელგია | 5 | 1 | 0 | 4 | 84:171 | 7 |
