1999 წლის 22 აგვისტოს ლონდონის „ჰაიბერიზე“ ჯიგრიანი ბურთაობა იყო. იქაური „არსენალი“ სერ ალექს ფერგიუსონის „მანჩესტერს“ მასპინძლობდა. პირველი ტაიმის მიწურულს ბერხკამპმა ლიუნგბერგს უპასა და მასპინძლები დაწინაურდნენ.
მეორე ნახევარში „ეშმაკებმა“ იძალეს და როი კინის წყვილი გოლით წინაც კი გავიდნენ, თუმცა ამბავი, რომლის გამოც ეს წერილი იწერება, მერეღა მოხდა…
სულ ბოლო წამებზე „არსენალმა“ ჯარიმის უფლება მიიღო. ბურთი საჯარიმოში დაკიდეს და მეტიუ აპსონმა უთავა – ვან დერ გოუმა ბურთი დაიჭირა, მასპინძელმა მარტინ კიოულმა კი იუხეშა და ბურთი კარში მეკარესთან ერთად შეიტანა. ვან დერ გოუმა თავის ტრავმა მიიღო და შესაცვლელი შეიქნა. გუნდის მეორე მეკარე მარკ ბოსნიჩი ასევე ტრავმირებული იყო და მოედანზე 21 წლის ნიკ კალკინი შეუშვეს – ეს მისი დებიუტი იყო პრემიერლიგაში.
კალკინი შევიდა, თავისუფალი დარტყმით ბურთი თამაშში შეიყვანა და… გრემ პოლმა მატჩის დამთავრებისა ჩასტვინა. ეს ნიკ კალკინის ერთადერთი 2 წამი იყო პრემიერლიგაში. მას შემდეგ ის მოედანზე არ გამოჩენილა.
„მანჩესტერმა“ ხან იჯარით გაუშვა ქვედა ლიგაში, მერე სულაც გაასხვისა და საბოლოოდ ნიკმა 26 წლის ასაკში ტრავმის გამო დაასრულა კარიერა.
ფეხბურთი მებაღეობამ შეცვალა, თუმცა ხანდახან მეკარეებსაც ავარჯიშებდა. რით არ არის გინესის რეკორდების წიგნში შესატანი?
ნიკ კალკინი – კაცი, რომლის პრემიერლიგური კარიერაც ორმა წამმა და ერთმა დარტყმამ დაიტია.
