რაც „ბარსელონაში” გადავიდა, ანტუან გრიზმანმა გულშემატკივარი დააჩვია, რომ მეტწილად მუშაობს, მაგრამ გოლები ვერ გააქვს. „გრანადასთან” სხვა სურათი ვიხილეთ. ფრანგმა ორი შეაგდო და ზოგადად, „ბლაუგრანაში” გადასვლის შემდეგ, ერთ-ერთი საუკეთესო ფეხბურთი ითამაშა.
მატჩის შემდეგ, Movistar-თან საუბრისას გრიზმანმა თქვა, რომ ძალიან გახარებულია, რადგან: „აქამდე ბურთი კარში ჯიუტად არ შედიოდა, ახლა კი შევარდა და იმედია, ამიერიდან ასეც გაგრძელდება”.
პირველ გოლზე ეჭვი გაჩნდა, რომ მსოფლიოს ჩემპიონი თამაშგარე მდგომარეობაში იდგა, მაგრამ მსაჯმა ჩათვალა, რადგან გრიზმანს ბურთი მას მერე მიუვიდა, რაც „გრანადას” მოთამაშეს რობერტო სოლდადოს შეეხო.
„პირველი გოლი რომ გავიტანე, არ ვფიქრობდი, რომ ოფსაიდში ვიყავი და ამიტომაც არ გავჩერებულვარ. მივიღე და დავარტყი”, — თქვა გრიზმანმა.
ამ შეხვედრაში აღნიშვნის ღირსია აგრეთვე სამუელ უმტიტი, რომელმაც მიმდინარე სეზონში პირველად ითამაშა სასტარტო შემადგენლობაში. კაცმა რომ თქვას, ახლაც არ უპირებდნენ ძირითადში დაყენებას, მაგრამ მოთელვისას რონალდ არაუხო დაშავდა.
გრიზმანი: „სამუ არ იყო მზად, რადგან არ გახურებულა. მან მხოლოდ მოთელვის შემდეგ გაიგო რომ უნდა ეთამაშა, მაგრამ ყველაფერს ძალიან კარგად გაართვა თავი”.
გრიზმანმა აღნიშნა, რომ ამ შეხვედრაში, რომელიც მძიმე მინდორზე ჩატარდა, კარგი იყო ისიც, რომ ზოგიერთ წამყვან ფეხბურთელს დასვენების შესაძლებლობა მიეცა. მათ შორის გახლავთ ორი გოლის ავტორი ლეო მესიც, რომელიც რონალდ კუმანმა 4:0-ის შემდეგ, 65-ე წუთზე, შეცვალა.
„თთავი არ დაგვიზოგავს. იმისათვის, რომ კარგი შედეგების მიმდევრობა არ შეგვეწყვიტა, სამი ქულა გვჭირდებოდა და მიხარია, რომ ამ ქულების შევძელით. ამიერიდან, ყოველ შეხვედრაში სამი ქულა უნდა მოვიპოვოთ და ისე ვითამაშოთ, როგორც რამდენიმე დღის წინ ბილბაოში ან დღეს, აქ.” — თქვა ბოლოს გრიზმანმა, რომლის გოლებსაც ქვემოთ, ვიდეოში გთავაზობთ.
