როგორც კი მაურისიო პოჩეტინო „პარი სენ ჟერმენს” ჩაიბარებს, დელე ალის „ტოტენჰემის” „ჯოჯოხეთიდან” გამოქცევას და დიდ ევროპულ კლუბში თამაშს შესთავაზებს. მოგეხსენებათ, პარიზელებმა შობის დღესასწაულის წინ თომას ტუხელი გაუშვეს და არგენტინელთან ფაქტობრივად მოლაპარაკებულები არიან.
პოჩეტინო 13 თვეა უმუშევარია. მისი ბოლო სამსახური სწორედ „ტოტენჰემ ჰოთსფური” იყო, საიდანაც გაათავისუფლეს და იმ დღიდან მოყოლებული, ინგლისში სულ იმას ლაპარაკობდნენ, რომ ერთ მშვენნიერ დღეს მას „მანჩესტერ იუნაიტედის” სათავეში იხილავდნენ. მისი სახელი, მთელი წლის განმავლობაში, ოლე გუნარ სულშერის თავზე დამოკლეს მახვილივით ეკიდა.
მანჩესტერელთა ნორვეგიელი თავკაცის სასიხარულოდ, მართალია, გუნდმა სეზონი ცუდად დაიწყო, მაგრამ შემდეგ გამოფხიზლდა. ახლა, ის პრემიერლიგაშიც განაგრძობს პირველი ადგილისთვის ბრძოლას და „კარაბაოს თასზეც” ნახევარფინალში გავიდა — 6 იანვარს „მანჩესტერ სიტის” ხვდება.
პოჩეტინო კი მზად არის კვლავ მოჰკიდოს ხელი საქმეს, რომელიც კარგად ეხერხება და თან ეს გააკეთოს ნაცნობ კლუბში, სადაც 2001-03 წლებში თამაშობდა.
ინგლისურმა პრესამ შეიტყო, რომ არგენტინელი იანვრის სატრანსფერო ბაზარზე უპირველეს ყოვლისა თავისი ყოფილი ფეხბურთელის, დელე ალის შეძენას აპირებს. ალის გადაბირებას რეალურს ის გარემოება ხდის, რომ ნახევარმცველი პოჩეტინოს დროს ძირითადში თამაშობდა, ჟოზე მოურინიუმ კი აითვალწუნა ან თავის ტაქტიკას ვერ მოარგო.
24 წლის ალიმ მიმდინარე სეზონში მხოლოდ 5 შეხვედრაში მიიღო მონაწილეობა. აქედან ერთი იყო მატჩი „კარაბაოს თასზე”, „სტოკის” წინააღმდეგ („სფურზმა” მოიგო 3:1), სადაც მეტოქის გოლი პორტუგალიელმა მწვრთნელმა მას დააბრალა და მოედნიდან სასწრაფოდ გაიყვანა.
მოურინიუმ ალიზე ასე თქვა: „მისი ამპლუის ფეხბურთელი პრობლემებს მეტოქეს უნდა უქმნიდეს და არა თავის გუნდს”.
„პარი სენ ჟერმენმა” კი ტუხელი ჩემპიონთა ლიგის ფინალში გასვლიდან ოთხი თვის შემდეგ გაუშვა. გერმანელის ხელში პარიზელებმა ზედიზედ ორჯერ მოიგეს საფრანგეთის ჩემპიონის ტიტული.
ტუხელმა „პარი სენ ჟერმენის” მწვრთნელის თანამდებობაზე ბოლო მატჩში „სტრასბურთან” 1:4 წააგო.
დღეისათვის პსჟ „ლიგა 1″-ში, 17 შეხვედრიდან 4 წაგებით, მესამე ადგილზეა.
