მართალია, „კარაბაოს თასის” მეოთხედფინალში „მანჩესტერ იუნაიტედმა” ლივერპულში „ევერტონს” 2:0 მოუგო და პირველი გოლი ურუგვაელმა ვეტერანმა ედინსონ კავანიმ გაიტანა, მაგრამ თავად კავანი გაძევებას გადარჩა. მსაჯმა ვერ დაინახა, რომ ის მასპინძელთა კოლუმბიელ ცენტრალურ მცველს იარი მინას ყელში სწვდა და მოედანზე წააქცია, რაც ქვემოთ, ვიდეოზე კარგად ჩანს.
არბიტრი გახლდათ ენდი მედლი. მოგეხსენებათ, „კარაბაოს თასს” ვიდეორეფერი არ ემსახურება და ამდენად მან ეპიზოდის ჩანაწერში ნახვაც ვერ შეძლო.
თამაში დრამატული გამოდგა, რადგან კავანიმ ანგარიში 88-ე წუთზე გახსნა. ამის შემდეგ „ევერტონმა” მდგომარეობის გამოსასწორებლად მთელი ძალები წინ გადაისროლა და შეცვლაზე შესული ფრანგი ანტონი მარსიალის მეორე გოლი გაეპარა.
მატჩისშემდგომ პრეს-კონფერენციაზე „იუნაიტედის” მწვრთნელ ოლე გუნარ სულშერს ჰკითხეს იყო თუ არა გასაგდები კავანი. ნორვეგიელმა უპასუხა:
„არა. ეს იყო ორი სამხრეთამერიკელი ფეხბურთელის დაპირისპირება, რომლებიც ერთმანეთს ადრეც შეხვედრიან. მგონი ამასწინათ შესარჩევში ითამაშეს ერთმანეთის წინააღმდეგ. ისინი ერთმანეთს იცნობენ. ასე რომ, ვფიქრობ, განსაკუთრებული არაფერი მომხდარა. ეს იყო პატიოსანი საფეხბურთო მატჩი, რომელიც მოიცავდა ორთაბრძოლებს. იყო ყვითელი ბარათებიც. მე კმაყოფილი დავრჩი.
კავანი მაღალი დონის თავდამსხმელია. დღეს ის შესანიშნავად გადაადგილდებოდა, კარგად იყენებდა ტექნიკურ არსენალს და მერცხენა ფეხით ჩინებული გოლი გაიტანა. ითვლება, რომ ბურთს მარცხენა ფეხით ის მარჯვენასავით კარგად ვერ არტყამს, მაგრამ ჩვენ ვარჯიშებზე მისი ცაციაც ბევრჯერ გვინახავს”.
„ევერტონის” მწვრთნელმა კარლო ანჩელოტიმ კი თქვა, რომ ეპიზოდი არ დაუნახავს და მატჩის შემდეგ გასახდელში შესულ ფეხბურთელებსაც არ უხსენებიათ.
