ძიუდოს საერთაშორისო ფედერაციამ ახალი რეიტინგი გამოაქვეყნა, რომლის მიხედვითაც ძიუდოისტები 2021 წლის პირველ მნიშვნელოვან ტურნირზე წარსდგებიან.
ახალი სეზონი კი 11-13 იანვარს ყატარის დედაქალაქ დოჰაში დაიწყება. ეს იქნება მასტერსის ტურნირი, სადაც თითოეული წონითი კატეგორიის 36 საუკეთესო ძიუდოისტი იასპარეზებს.
ახალი რეიტინგის შედეგად კი პრესტიჟულ შეჯიბრებაზე გამოსვლის უფლებას საქართველოდან 14 ვაჟი და 2 ქალი ძიუდოისტი მიიღებს.
ვაჟებში – 60 კილოგრამ წონით კატეგორიაში ლუხუმ ჩხვიმიანი (მე-9 ადგილი რეიტინგში), ამირან პაპინაშვილი (17) და თემურ ნოზაძე (34) იქნებიან;
66 კილოგრამ წონაში საქართველოს ვაჟა მარგველაშვილი (5) და ნაგრატ ნინიაშვილი (29) წარადგენენ;
ერთ-ერთ ყველაზე პრობლემურ 73 წონით კატეგორიაში მხოლოდ ლაშა შავდათუაშვილი (16) იჭიდავებს;
81 კგ. კატეგორია ტატო გრიგალაშვილმა (8) და ლუკა მაისურაძემ (12) შეავსეს;
2 მონაწილე გვეყოლება 90 კგ. წონით კატეგორიაშიც – ბექა ღვინიაშვილი (10) და ლაშა ბექაური (12);
100 კგ. – ში მხოლოდ ვარლამ ლიპარტელიანი (4) იჭიდავებს;
+100 კგ. – გურამ თუშიშვილი (4), გელა ზაალიშვილი (14) და ლევან მატიაშვილი (21);
ქალთა შორის მხოლოდ 2 მონაწილე გვეყოლება: 52 წონით კატეგორიაში ტატიანა ლევიცკა-შუკვანი (28) და 57 კილოში – ეთერ ლიპარტელიანი (28).
