ფიფას 2020 წლის საუკეთესოთა დაჯილდოების თემა მსოფლიო მედიის ყურადღების ცენტრშია. ცხადია, ყველას აინტერესებს ვინ ვის მისცა ხმა და უპირველეს ყოვლისა, თვალი ეპოქის უდიდესი ფეხბურთელების, ლეო მესისა და კრიშტიანუ რონალდუს შევსებული ბიულეტენებისკენ გაურბის.
მესიმ რონალდუ სამ საუკეთესოში საერთოდ არ ჩაწერა, ხოლო გამარჯვებულ რობერტ ლევანდოვსკის მესამე ადგილი მიაკუთვნა. არგენტინის ნაკრების კაპიტნის ვერსიით, 2020 წლის საუკეთესო ფეხბურთელი გახლდათ ნეიმარი, მეორე იყო კილიან მბაპე, ხოლო მესამე, როგორც უკვე მოგახსენეთ, ლევანდოვსკი — „ბაიერნისა” და პოლონეთის ნაკრების ვარსკვლავი.
რონალდუმ, რომელმაც მესი შარშანდელ გამოკითხვაში არ ჩაწერა, ამჯერად ორიგინალურობა არ გამოიჩინა და როგორც უმრავლესობამ, საუკეთესო ფეხბურთელად ლევანდოვსკი დაასახელა. პორტუგალიელის აზრით, 2020-ში მეორე იყო ლეო მესი, ხოლო მესამე კილიან მბაპე.
