ედინ ტერზიჩი. 38 წლის. თამაშობდა გუნდებში, რომლებიც ბევრს ალბათ გერმანიაშიც არ გაუგია: „ისერლონში”, „ვესტფალია ჰერნეში”, „ვატენშაიდ 09″-ში და „კლოპენბურგში”. ის დაიბადა პატარა ქალაქ მენდენში, რომელიც დორტმუნდთან ანუ მაშინდელ გერმანიის ფედერაციულ რესპუბლიკაში მდებარეობდა. დედით ხორვატია, მამით კი ბოსნიელი. გერმანიის გარდა ხორვატიის მოქალაქეცაა. ბოხუმში, რურის უნივერსიტეტში დამთავრებული აქვს სპორტულ მეცნიერებათა ფაკულტეტი.
ედინ ტერზიჩი „დორტმუნდის” მწვრთნელად დანიშნეს. მან ამ თანამდებობაზე 63 წლის შვეიცარიელი ლუსიენ ფავრი შეცვალა. აქამდე ფავრის ასისტენტი იყო.
ადრე, მთავარ მწვრთნელად არ უმუშავია. იმ წლებში, როდესაც „დორტმუნდს” იურგენ კლოპი წვრთნიდა, ტერზიჩი სკაუტი და კლუბის საყმაწვილო აკადემიის მწვრთნელის ასისტენტი იყო. მას ჰყავს უფროსი ძმა ალენი, რომელიც ასევე „დორტმუნდშია” და ერთიხანობა კლუბის მეორე გუნდის მწვრთნელის მოვალეობას ასრულებდა.
ედინ ტერზიჩი „დორტმუნდს” პირველად დღეს, ბრემენში, „ვერდერის” წინააღმდეგ გაუძღვება. შეგახსენებთ, რომ წინა შეხვედრა „ყვითლებმა” შინ, „შტუტგარტთან”, დიდი ანგარიშით (1:5) წააგეს. ფავრის სამსახური სწორედ ამ მარცხს შეეწირა.
„დღესვე შემიძლია დავაყარო ბიჭებს ახალი იდეები, მაგრამ წარსულში ბევრი კარგი რამ გაგვიკეთებია და ის არ უნდა დავივიწყოთ. ამ ეტაპზე, როდესაც მოედანზე გავალთ, მთავარი საკუთარი თავის რწმენა და მხნეობაა. და საერთოდ, როდესაც საქმეები ცუდად მიდის, ჟინია საჭირო. სულ უნდა გვახსოვდეს ჩვენი ძლიერი თვისებები და მათი შენარჩუნება უნდა შეგვეძლოს.
ყველაფერი, რაც კარგი გვაქვს, უნდა მოვიკრიბოთ და შობამდე დარჩენილ სამ თამაშში ჩავდოთ,” — თქვა ტერზიჩმა პირველ პრეს-კონფერენციაზე.
შემდეგ, დორტმუნდელთა ახალმა თავკაცმა განაგრძო: „მე, აქედან 30 კილომეტრში დავიბადე და 9 წლის გახლდით, როდესაც „ვესტფალენშტადიონზე” პირველად დავესწარი თამაშს. ასეთი სიახლოვის მიუხედავად, ვერასდროს ვიოცნებებდი, რომ აქ, ოდესმე, ასეთ როლში აღმოვჩნდებოდი”.
„დორტმუნდის” სპორტულმა დირექტორმა მიხაელ ცორკმა კი თქვა, რომ ჯერჯერობით, ტერზიჩს კონტრაქტი ზაფხულამდე გაუფორმეს.
„ამ ეტაპზე მთავარი ამოცანა კვლავ ლიდერებში დამკვიდრებაა. ზაფხულამდე კი ჯერ ადრეა. კონტრაქტის შესახებ მომავალში დავილაპარაკებთ”, — თქვა ცორკმა.
